República Democrática de Timor-Leste
Parlamento Nacional
BANKADA FRETILIN
Komunicado Imprensa
Díli 19 Novembro 2008
Bankada FRETILIN husu ba Presidenti Republika Demiti Longuinhos Monteiro
Bankada FRETILIN husu dala ida tan ba Presidente Republika, Dr. José Ramos Horta atu demiti Sr. Longuinhos Monteiro nudar Prokurador Jeral Republika, koalia deputadu Arsenio bano iha Dili ohin.
“Tuir notisia neebe Timor Post publika iha loron 5 Novembro, no STL publika horseik, prosessu Julgamento iha Tribunal Distrital Dili relasionado ho kazu somasi Fransisco Akoileong no Mariana Wijaya neebe hahu semana hirak liu ba halao nafatin maibe Sr Longuinhos Monteiro neebe hetan akuzasaun kamas kona ba suborn husi Sr. Akoileong, sei halao nafatin knar nudar Prokurador Jeral Republika. Bankada FRETILIN, neebe foti ona akuzasaun balun hasoru Sr. Monteiro hanesan gravasaun telefonika, preokupa tebetebes ho evidensia neebe mosu iha julgamentu ida nee nia laran. Evidensias neebe mosu kona ba akuzasaun subornu hatudu dala ida tan katak nia laiha ona kredibilidade halao nia knar nudar Prokurador Jeral da Republika ba rai nee,” dehan Bano
“Oinsa publiko timor oan bele fiar katak Sr Longuinhos Monteiro bele halao nia knar lolos hanesan Prokurador Jeral de Republika ba rai nee no representa serbisu Ministeriu Publiku, se nia rasik involve nia a’an iha alegasaun kazu subornu nian hanesan saida mak akontese dadauk ba Sr Fransisco Akoileong no Mariana Wijaya.
Tuir lolos molok atu tuir julgamento ba kazu nebe involve nia an rasik Sr Longuinhos Monteiro tenke resigna aan uluk husi nia knar Prokurador Jeral Republika. Se nia la iha considerasaun atu demite a’an, entaun diak liu Presidente Republika foti desizaqun hodi hadok nia husi konflito interese iha lalaok prosesu julgamento ninian,” hatutan Bano.
“Ida nee primeira vez iha mundo tomak karik neebe Procurador Geral ida neebe hetan akuzasaun ida husi kleur hanesan nee la suspende ka deimiti enkuantu prosessu julgamentu lao hela. Ita iha ona presedente a’at ida iha ita nia rai,” Bano dehan tan.
Bano dehan mos, “Kazu Sr. Akoileong neebe involve Sr Longuinhos Monteiro grave teb-tebes no iha impaktu ba kredibilidade serbisu prokuradoria nian iha Ministerio Publiku no kredibilidade ba sistema justisa tomak. Atu bele harii fila hikas konfiansa povo nian ba serbisu Ministerio Publiko nia tuir artigu 132 no 133 Konstituisaun RDTL, nebe hateten katak Prokuradoria Jeral Republika mak representa serbisu Ministerio Publiko nian. Tamba nee ami preokupa nia halau nafatin nia knaar enkuantu julgamentu nee lao.”
“ Ami husu ba Presidente Republika, Jose Ramos Horta atu uza dadauk nia knar tuir artigu 133 Konstituisaun RDTL hodi demiti Sr. Longuinhos Monteiro nudar Prokudaror Jeral Republika hodi harii fila hikas konfiansa ba serbisu Ministerio Publiku nian, neebe hetan kanek todan husik kleur ona tamba lalaok ema neebe okupa kargu hela,” Bano taka.
