REPUBLICA DEMOCRATICA DE TIMOR LESTE
PARLAMENTO NACIONAL
BANCADA PARLAMENTAR FRETILIN
Dili, 6 Julho de 2009
Deklarasaun Politika
"PRIMEIRU MINISTRU DE FACTO XANANA GUSMAO TENKE RESIGNA A'AN"
Sr. Presidente
Tuir Lei Inan RDTL nian, Governu tenki responsabiliza ba Parlamentu Nasional no ba Presidente Republika, kona ba ezekusaun nia knar politika domestika no politika eksterna tuir konstituisaun no lei.
Parlamentu Nasional maka aprova OJE no Parlamentu Nasional maka fiskaliza ezekusaun orsamentu. Parlamentu Nasional mos maka fiskaliza politika governu nian no administrasaun publika nia hahalok.
Ne’e signifika katak Parlamentu Nasional iha kbiit tuir konstituisaun atu hetan asesu ba dokumentus nebe parlamentu presiza atu bele halo fiskalizasaun ida nebe efektivu ba Governu.
Maibe governu de facto, liu-liu Xefe Governu Sua Exselensia Sr Xanana Gusmao, hatudu ona desde Agosto 2007 bainhira hahu halao knar ukun, la respeita prinsipius no responsabilidade hirak ne’e. No halao buat hotu-hotu la iha transparensia no la halao boa governasaun.
Sr. Presidente
Ohin Bankada Parlamentar FRETILIN mai foti dala ida tan iha Uma Fukun Povo Maubere nian, kestaun importante kona ba milloes dolares nebe Governu de facto ida ne’e aloka ba sosa fo’os liu hosi Fundu Estabilizasaun Ekonomika.
Politika sosa fo’os hosi Governu AMP, hodi harii Fundu Estabilizasaun Ekonomika ho razaun atu ajuda povo kiik no kiak hasoru hamlaha no hasoru krize alimentar. Maibe tuir mai, realidade hatudu oin seluk,politika ida ne’e mai fo’o deit ajuda ba familia no amigos sira hodi harii kroni-kroni oioin no haburas korupsaun. Karik ida ne’e makahanaran REFORMA?
Iha loron 11 Novembru 2008 Bankada Parlamentar FRETILIN liu hosi Plenaria ida ne’e kestiona kona ba politika Governu AMP harii FEE nebe mai habokur deit amigus emprezarius balu, duke ajuda povo kiik no kiak nebe la iha kbiit sosa fo’os ho folin a’as tebes.
No mos iha tempu neba Bankada FRETILIN hatoo ba meja, husu interpelasaun ba Governu, bazeia ba Konstituisaun no Regimentu Internu Parlamentu nian, kona ba Fundu Seguransa Alimentar no Fundu Estabilizasaun Ekonomika, maibe to’o ohin loron ami sei dauk simu resposta ida.
Tamba gestaun ida nebe a’at tebes hosi Governu ida ne’e, fo’os barak estraga iha roh laran, iha armagem no barak mos lakon, tamba ne’e problema fo’os hetan mos preokupasaun hosi Presidente Republika nebe haruka surat ba Provedor Direitus Humanus no Justisa atu halao investigasaun ba Ministru de facto Turismu, Komersiu no Industria Gil Alves.
Parlamentu ne’e rasik, liu hosi deputadus sira no hosi Komisaun kompetentes kestiona dala barak tebes kona ba problema fo’os ida ne’e,no husu ministeriu tutela atu mai esplika iha Parlamentu, maibe ida ne’e la halao. Tamba sa?
Sr. Presidente
Megaprojektu sosa fo’os toneladas rihun ba rihun ho osan milloes dolares husi Fundu Estabelizasaun Ekonomika, Fundu Seguransa Alimentar no Fundo Rezerva Kontingensia hamutuk total US$. 92.316.599.00 lori mos preokupasaun bo’ot ba povo tomak, sosiedade sivil, Igreja nomedia nasional.
Hanesan mos media internasional, Radio Australia no Radio no Televisaun ABC fo sai rezultadu sira nia investigasaun kona ba kontratu sosa fo’os milloes dolares, nebe Primeiro Ministru de facto Timor Leste nian, fo ba kompania nia oan feto nian, nia feto foun nian no Ministru Ekonomia no Dezenvolvimentu de facto, Sr. Joao Goncalves nia kaben, Sra. Kathleen Goncalves nian no ministra solidariadade nia oan, nebe kaben ho Primeiru Ministru nia Subrinho nian.
Tuir reportagem media internasional ne’e iha sesta-feira loron 26 Junho 2009 ho titulu “GUSMAO HASORU ALEGASAUN KORUPSAUN’ hateten :“eskandalu korupsaun foun, agora daudaun kona hela Xanana Gusmao, ema ida nebe hanesan aman Timor Leste ba ukun rasik a’an”.
Primeiru Minstru autoriza kontratu ida ho montante milloes dolares, nebe Governu fo ba kompania ida nebe pertense ba nia oan feto, sosio ho ema seluk. ABC Radio Australia nia investigasaun hetan katak iha tinan kotuk Prima Food manan kontratu ida husi governu atu sosa fo’os ho valor osan US$ 3.5 milloes.
Zenilda Gusmao, Primeiru Ministru nia oan feto, tama iha kompania Prima Food hanesan aksionista ho 11,10 %, tuir lista Registus Negosius Timor Leste nian iha tinan 2008.
Televizaun ABC hateten kompania Olifante nebe hetan mos kontratu fo’os hosi governu milloes dolares, alega katak kompanhia nee nia nain maka Sra ida nebe Primeiru Ministru de facto nia feto foun.
Iha entrevista ho membrus governu, sira mos la nega ka desmente factu sida ne’e maibe sira buka justifika deit PM de facto no Ministra Finansas nia hahalok. Sira taka envolvimentu Ministru Goncalves niakaben nia envolvimentu.
Ami afirma iha Uma Fukun Povo nian ida ne’e katak Primeiru Ministru de facto viola duni Lei Aprovisionamnetu no 10/2005 artigu 32 kona ba konflitu de interese, nebe familias ukun nain sira 2º grau konsanguine labele partisipa iha prosesu tender. No ami mos kestiona tamba sa maka Ministru Goncalves nia kaben hetan kedas kontratu tolu ba sosa fo’os, ho montante dolares milloes ba milloes. No Ministru hirak tan nia kaben ka lain no oan, mos hetan kontratu fo’os ka kontratu seluk.
Ami mos kestiona tamba sa maka iha kompanhia ida Sra Kathleen Goncalves nian, mosu maibe ho naran Fon Ha Tchong. Ema barak konese semaka Kathleen Goncalves, maibe ema barak liu maka la hatene se maka Fon Ha Tchong.
Bankada FRETILIN kestiona liu, no tanba Governu mos rekonese ona katak kontratu fo’os hirak ne’e entrega deit. La liu hosi tender. La iha konkursu. Kontratu mosu deit hosi rekomendasaun Ministru no Primeiru Ministru nian. Ida ne’e mos Governu fo sai ona rekonese katak sira hili malu no fo deit. Klaru katak prosedimentu tender nebe lolos assegura transparensia no responsabilidade ba osan povo nian nebe bo’ot tebes. Maibe Governu ida ne’e la aplika no la respeita.
Sr. Presidente,
Transparensia no boa governasaun la bele sai deit nudar diskursu politiku nebe midar no furak.Tanba Timor Leste hanesan Estadu Direitu Demokratiku ne’e rasik nia ejizensia dinamika ba patrimoniu prinsipius no regras, maka impoen katak governasaun demokratiku ne’e tenki sai duni boa governasaun iha ita nia rain.
Porta voz Governu AMP nian ida naran Melissa Stephens, nebe dala ruma uza mos naran Missy Stephens, deklara ba ABC katak : Governu sempre transparente kona ba kontratu hirak ne’e, no halo esforsu bo’ot tebtebes atu harii ambienti ida justu no hanesan ba emprezarius hotu-hotu.
Ami la fiar no ami la simu deklarasaun ida ne’e, no emprezarius barak mos la simu ida ne’e. A’at liu tan, iha loron 27 Junhu, Sr Agio Pereira nudar porta voz Governu de facto nian dehan katak Lei Aprovisionamentu, liu-liu Artigu 32 nebe bandu membru governu no funsionariu publiku atu labele fo kontratu ba sira nia maluk, la aplika ba Primeiru Ministru, tamba nia titular orgaun soberania, tuir lei titulares orgaun soberania nian.
Ne’e la los. Lei Titulares Orgaun Soberania laos atu fo benefisiu ba titular sira atu buka se’es a’an hosi lei. Lei hotu-hotu iha ita hotu nia leten. Labele uza fali lei, atu buka taka deit hahalok nebe’e sira rasik mos hatene ona, sala bo’ot no illegal. Sua Exselensia Sr Xanana Gusmao viola ona Lei Aprovisionamentu, no dala barak liu kona ba kontratu sosa fo’os. Ministra Finansas rasik mos halo tuir. Sira taka malu no buka soe rai rahun. Sira nunka hakarak hata’an ba ejizensias hosi deputadus sira ba kontratu sosa fo’os.
Ne’e hatudu Governu de facto ida ne’e la respeita Parlamentu Nasional- Uma Fukun Povo nian. Ami hanoin katak, prinsipiu lulik ida demokrasia nian, maka tenki iha respeitu malu entre instituisoens estadu nian.
Sr. Presidente,
Colegas Deputadus no Povo Maubere .
Ikus liu, Bankada Parlamentar FRETILIN deklara iha Uma Fukun ida nee katak, se Primeiru Ministru de facto iha duni konsiensia responsabilidade moral no honestidade politika, hanesan bainhira Primeiru Ministru fo suspensaun ba Direktores sira tanba deit alegasaun KKN, ami hanoin Primeiru Ministru tenki sai konsekwente honia prinsipiu hodi rezigna a’an, enkuantu investigasaun halao ba kazu ida ne’e. Hodi nune’e bele salvaguarda figura ida resistensia nasional nian ho naran – Kay Rala Xanana Gusmao.
BA INFORMASAUN TAN DERE BA ABRAO TILMAN IHA 734 7195
