FRETILIN: Komunikado ba Emprensa

BANCADA PARLAMENTAR FRETILIN

REPÚBLICA DEMOCRÁTICA DE TIMOR - LESTE

PARLAMENTO NACIONAL

Dili, 22 Dezembru 2009

CIDADE DILI IHA PROBLEMAS INUNDASAUN BARAK TAMBA AMP LA IHA PLANU URBANIZASAUN KA HALO MANUTENSAUN BA MOTA NO BEE DALAN

Xefi Bankada Parlamentar FRETILIN, Deputadu Aniceto Guterres deklara ba media ohin katak, estragus ne´ebé povu barak hetan husi udan boot, ne´ebé sobu uma no estragus seluk tan, ne´e la mosu tamba udan, maibé tamba governu la iha planu no programa atu halo cidade Dili sai cidade diak no organizadu. Iha semana liu ba bainhira udan makas monu iha Dili, povu barak nia uma hetan estragus tamba udan hamosu inundasaun iha fatin barak iha cidade laran.

"Uluk Primeiru Governu Konstitusional FRETILIN halo no aprova planu mestre re-urbanizasaun, atu hadia cidade Dili no Baucau. Grupu Kooperasaun Portuguesa GERTIL halo planu mestre atu hadia cidade Dili no Baucau, liu-liu ordenamentu teritorial no protesaun ambiental, hanesan harii bee dalan ne´ebé presiza no kanalizasaun ba udan ben ba mota no tasi, atu nune labele estraga dalan, pontes, ema nia uma no ema nia kintal. Planu mestre ne´e aprova iha Konselho Ministru iha tinan 2004, no hahu implementa ona iha tempu ne´ebá liu husi Ministeriu Obras Públikas. Maibé iha tempu ne´ebá orsamentu la iha atu halao ho implementasaun makas, biar nune governu hahu hadia bairus balun. Iha mos Programa Investimentu Sektorial ne´ebé tau prioridade ba drenagen iha Dili, atu hadia valetas, drenagen boot sira hotu iha estradas okos, no halo planu drenagen foun. Aguas de Portugal servisu hamutuk ho Ministeriu iha tempu ne´ebá atu halo konstrusaun ba sistema drenagen ka bee dalan ba cidade tomak. Maibé tamba orsamentu la iha tempu ne´ebá, entaun governu buka doador ruma no hahu negosiasoens ho governu Japaun atu halo projetu ne´e", Aniceto dehan.

Aniceto hatutan tan katak, planu mestre hadia cidade Dili no Baucau, governu de faktu AMP soe lakon de´it bainhira kaer ukun, no seidauk halo aktualizasaun ka planu foun. Sira haluha halo ordenamentu teritorial no urbanizasaun maske iha sekretariu estadu ida ho naran urbanizasaun. Maibé la halo buat ida, tau naran de´it. Nia lamenta moos katak Programa Investimentu Sektorial ne´ebé uluk fó prioridade ba investimentu iha drenagen cidade Dili no Baucau, ne´ebé bele evita inundasaun boot no estragus hanesan povu hetan dadauk. "Governu nia planu ba drenagen cidade Dili iha ne´ebé? La iha, tamba sira la iha planu. Lolos molok hadia trotoar iha cidade Dili, hadia ka halo uluk drenagen foun. Tau matan ba bee dalan iha estrada no trotoar nia okos. Maibé tamba hakarak halo buat kosmetiku de´it, halo fali trotoar molok halo buat ne´ebé presiza liu, hanesan drenagen. Ne´e ezemplu ida ne´ebé hatudu governasaun ladiak, governasaun sem planus no programas. Entaun resultadu, povu mak sofre no terus tamba inkapasidade governu. Koalia barak kona ba "planu estrategiku" maibé iha tinan rua ho balun la halo. Entaun governasaun lao ad hoc de´it. Ne´e hatudu inkompetensia total".

"Governu mak tenke asume responsabilidade, la´os soe sala ba ema seluk. Agora ita rona fó sala ba "desastres naturais". Desastres naturais ne´e uluk governu FRETILIN mos hetan barak, maibé konsege evita ho orsamentu ne´ebé kiik liu. Agora ho orsamentu boot tebes, ne´ebé fakar tama ba ema ituan nia bolsu de´it, nakonu ho KKN, maibé la investe halo drenagen, valetas ka halo kontrola ba mota dalan atu inundasaun labele mosu iha povu nia leet".

"Ita hare mos Prezidente Repúblika dala ida tan koalia la los, bainhira governu uluk planu la iha. Ne´e tendensia soe sala ba ema seluk. Uluk nia nudar Ministru Negosius Estrangeirus tenke hatene saida mak governu FRETILIN halo, liu-liu ba planu mestre re-urbanizasaun ba Baucau no Dili. Ita hare de´it uluk nia promete buat barak dehan nia belun Wideform Constructions, Sr. Fernando Fereira, mak atu halo konstrusaun edifisiu boot iha Hello Mister nia fatin. Maibé iha ne´ebé konstrusaun ne´e? Aniceto dehan.

Aniceto hatutan katak maske orsamentu boot, maske halo projektu ilegal no nakonu ho KKN ho naran Pakote Referendum, realidade manutensaun tintinan ba mota iha rai Timor, governu de faktu la halo, tamba ne´e mak mota sai boot no halo inundasaun barak. Tuir Aniceto tamba la iha programa manutensaun ba mota dalan, valetas no drenagen mak udan been hamosu inundasaun no estraga povu barak nia uma no sasan.

"Tamba ne´e mak ami dehan, problema agora dadaun ne´ebé hamosu inundasaun ne´e la´os tamba "desastres naturais" maibé tamba "desastres inkompetensia AMP nian". Deputadu Bankada FRETILIN iha Komisaun Infraestruturas halo dadaun levantamentu kona ba inundasaun no estragus barak, no sei responsabiliza governu ba povu sira ne´ebé lakon uma no sasan. Dala ida tan ita hare orsamentu bot Estadu nian sira lori habokur sira nia maluk balun de´it, maibé la fó benefisiu ba povu. Ne´e mak realidade desastres governasaun ida ne´e" Aniceto deklara.

Ba informasaun tan dere ba: 723 8569