Komunikadu ba Imprensa
Dili, 29 Desembru 2009
"Jovem ida mate, ida kanek"
FRETILIN ezigi investigasaun seriu
Tuir informasaun nebe Bankada Parlamentar FRETILIN simu, ohin dader jovem ida mate tamba hetan tiru hori kalan iha insidente violensia nebe mosu iha festa ida nia laran iha Salaun Delta Nova, Delta Comoro, Dili. Jovem ida tan hetan tiru kanek no baixa hela iha Hospital Nasional Guido Valadares iha Dili. Iha tempu hanesan agentes PNTL tenke tu´un ba fatin nebe halo intervensaun atu hapara konflitu violenta nebe mosu iha festa fatin.
Ohin dader mos familia no belun vitima nain rua sira nian apresenta iha Uma Fukun no halao audiensia ho Prezidente Parlamentu Nasional.
Xefi Bankada FRETILIN nian, Deputadu Aniceto Guterres deklara ba jornalistas iha Dili ohin katak Bankada FRETILIN ezigi investigasaun seriu ba acontesimentu ohin dader nebe jovem ida hetan mate no ida kanek seriu.
"Akontesimentu iha nebe jovem ida hetan tiru mate no ida seluk hetan tiru kanek todan, seidauk klaru kona ba se mak tiru ka se mak sala iha akontesimentu neba. Maibe buat ida mak klaru tuir ami nia informasaun katak jovem nain rua nebe hetan tiru rasik la lori kilat kroat ruma. Tamba akontesimentu seidauk klaru, ita la bele fo sala ba se se deit. Maibe bainhira asaun polisial resulta iha mate ka kanek husi tiru, neé situasaun seriu tebes. Entaun tenke loke urgentemente investigasaun seriu no klean ida atu halo klaru, atu buka se presiza ba justisa ka lae".
"Bankada FRETILIN fo ami nia condolencias ba familia vitima matebian nian, no hamutuk ho ema barak reza katak vitima nebe hetan kanek sei rekupera lalais", Guterres dehan.
Maibe nia no Bankada FRETILIN tomak mos husu ba ema hotu atu hakmatek no husik lei no justisa lao tuir sira nia dalan, "Tamba ami nudar Povu nia representante sei tau matan katak investigasaun lao duni ho imparsialidade, seriedade no tuir lei. Ami husu ba ema hotu atu hakmatek. Husu atu labele halo julgamentu ba se se deit, tamba ida neé papel autoridade investigativa no Ministeriu Publiku nia knaar atu halao investigasaun no tuir mai Tribunal mak bele halo julgamentu", Guterres deklara.
Guterres dehan katak Bankada FRETILIN nia deputadus agora dadaun buka hela informasaun kona ba akontesimentu atu bele akompanha ho didiak, tuir deputadu nia knaar fiskalizador, katak prosesu investigasaun lao duni ho seriedade no urgensia.
"FRETILIN hanoin katak importante tebes atu halao investigasaun ida nebe bele hasai resultadu transparente, kredivel no tuir lei nebe bele satisfas ema hotu nebe afetadu, liliu vitima matebian, vitima kanek no sira nia familia. Ita hare ona toó ohin loron katak investagasaun barak ba atuasaun polisial la lao toó hotu, la iha kredibilidade, no la iha resultadu ba familia no vitima sira. Ami sei asegura katak ida neé la akontese iha kazu ida neé", Guterres temik.
Guterres exige mos ba Provedor Direitus Humanus no Justisa atu akompanha investigasaun atu hare se iha indicios ruma kona ba violasaun direitus humanus.
Ba informasaun tan dere ba Deputadu José Teixeira
Tlv: 728 70 80
