KOMUNIKADO IMPRENSA HUSI FRETILIN

Governu loke dalan ba KKN; subar hahalok iha akordu "konfidensial" oioin.

FRETILIN: Nee la transparenti, illegal no impede parlamentu bele fiskalisa.

FRETILIN, no deputadu husi bankada seluk iha Uma Fukun Parlamentu Nasional, orseik locraic hakfodak bainhira de-facto Vice Primeiru Ministru, Jose Luis Guterres hatan ba deputadus sira nia perguntas kona ba governu la iha vontade politika atu halau ukun ho transparensia no loke dalan ba KKN tanba la fo sai kontratu oioinneebe deputadus sira husu, ho razaun katak tanba nee konfidensialentre governu no empresariu sira tuir kontratu nia artigus.

Vice PM hatan katak governu labela tanba "ita hotu hatene iha kontratu neebe iha artigu ida neebe dehan katak akordu neeba konfidensial", no tanba nee mak governu labele fo sai ba deputadus ka ema seluk.

Vice Xefe bankada FRETILIN nian, Deputadu Francisco Branco dehan katak, "Ida nee hatudu momos katak ita bele harii komissaun antikorrupsaun, maibe proposta Lei Anti Korrupsaun neebe dadaun iha Kommissaun A no C parlamentu nian, nakonu mos ho artigus'konfidensialidade' neebe sei impede komissaun anti korrupsaun nia servisu no liliu impede parlamentu bele fiskaliza komissaun antikorrupsaun nia servisu". Nee hatudu seriedade no vontade neebe governu de facto ida nee iha ba transparensia no efetividade hasoru KKN.

Se governu bele subar dokumentus husi parlamentu neebe orgaun soberania neebe tuir konstituisaun aas liu fiskaliza servisu governu nian, entaun oinsa kommissaun bele hetan assessu ba dokumentus hirak nee?" Branco husu."Uluk deputadus husi bankada FRETILIN, no bankada opozisaun de facto seluk husu dalan barak, halo rekerimentu iha hakerek, husu iha diskusaun plenaria, maibe de facto PM nem hatan. Nia tilun hanesan diuk fali, hanesa la rona ami nia pedidus. Halo fali hanesan la rona.

Iha tempu neeba ami hanoin deit tanba arrogansia karik, maibe agora ami compreende tanba sa mak de facto PM la hatan. Tanba hanesan defacto Vice PM dehan: sira subar iha 'konfidensialidade' nia kotuk.

Halo buat barak neebe tuir los ita hotu nudar Povo iha direitu atu hatene, maibe labele tanba konfidensial entre sira deit. Buat neebe ami iha parlamentu nudar Povo nia representante iha direitu atu hetan atu bele halau ami knaar nudar fiskalizador ba governo nia governasaun ami la iha direitu, no sira deit mak bele hatene" dehan Branco.

Branco tatoli dokumentus importante ba parlamentu halau sira nia knaar hirak neebe sira husu maibe to'o agora governu la hatan:

1. Dokumentu sosa Prado neebe sai fali Pajero, neebe to'o agora ofisialmente nem meza parlamentu nem governu hatan;

2. Kontratus assessores barak sira nian neebe bankada FRETILIN husu iha rekerimentu ofisial husi governu;

3. Dokumentus kontratu sosa sentral oleo pesadu nian ho Kompania China Nuclear Company neebe bankada balun ezigi ona atu bele fiskaliza se halau tuir lei ka lae;

4. Dokumentus kontratu sosa ro ahi nian, neebe halo sem tender, hili kompania ida deit;

5. Dokumentus kona ba kontratu sosa fos husi liur montante $48milloens, neebe Ministru de facto Gil Alves assina iha Novembru 2008, no neebe FRETILIN suspeita viola akordaun tribunal nian tanba hasai husi fundu estabilizasaun ekonomiku neebe tribunal deklara incosntitusional;

6. Akordu hirak neebe assina ho kompania oioin (ami nem hatene kompania se mak tama iha laran tanba governu subar didiak) kona ba gas husi kampu Greater Sunrise, liliu ida kona ba direitu neebe governu dehan fo ba kompania Sul Korea nian atu faan gas husi Greater Sunrise,tanba sira kontribui ba halo estudu dada kadoras mai rai Timor."Agora mak ami hatene katak dokumentus hirak nee 'konfidensial' entre governu no empresariu sira. Nee sira nia negosiu.

Povo, no deputadus neebe povo nia representantes, la iha direitu atu hetan dokumentus hirak nee tanba 'konfidensial', tanba sira deit mak bele hatene. Povo la iha direitu atu halo fiskalizasaun ba hahalok governu nian kona ba buat barak hirak neebe iha impaktu makas ba Povo no nasaun nia futuru.

Nee mak realidade. Nee mak pratica governasaun sira nian. Lalika mai koalia ona kona ba luta hasoru KKN. Hahalok hirak nee, subar iha'konfidensialidade' mak fo tulun ba KKN, taka dalan ba ita bele deskobre KKN iha neebe iha ita nia rain, taka metin iha nakukun hahalok KKN, tanba taka dalan ba governasaun neebe transparenti,"Branco hatutan.

Branco husu mos, tansa mak kontratu importante hanesan mina rai ihaTasi Timor, Bayu-Undan, Greater Sunrise, Tratadu Tasi Timor, Tratadu Sunrise, esplorasaun iha Tasi Timor hotu tuir lei Mina Rai tenki fosai ba publiku? La iha konfidensialidade. Uluk governu tau iha internet hotu. Tansa mak ida nee bele fo sai no sosa fos ka ro ahi ka geradores labele?"

FRETILIN hetan ona porvas katak kompania balun neebe hetan benefisiu husi kontratus millioens ba millions la iha kapasidade atu halau kontratu neebe sira hetan.

Ami hatene mos katak, kontratu sosa fos mos ita seidauk bele analisa didiak se kontratu nee hetan benefisiu folin no kualidade diak ka lae, tanba 'konfidensial'. Bele hatene lolos se lao husi prosesu tender ka lae? Bele hatene se se deit mak tama nudar 'empresariu'? Se se nia feen ka lain deit mak tama iha laran? Tanba nee mak tenki subar ho konfidensialidade karik?"

Ba ami 'konfidensialidade' hirak neebe hatama iha akordu entre governu no empresarius, nee illegal no incosntitusional. FRETILIN sei buka dalan juridico oioin atu loke buat hirak neebe subar, hasai husi nakukun, hodi lori ba naroman," Branco taka.

BA INFORMASAUN TAN, BELE DERE BA DEPUTADU FRANCISCO BRANCO IHA 723 7124.