Dili, 12 Janeiru 2010
Sekretáriu Jeral FRETILIN koalia ho Ian Martin no Xefe UNMIT kona ba paz, estabilidade no desenvolvimentu iha Timor-Leste.
Ohin dader, loron 12 fulan Janeiru, tinan 2010, Eis Primeiru Ministru no Sekretáriu Jeral FRETILIN nian, Dr. Mari Alkatiri halao enkontru formal ho ekipa teknika ONU nian, nebe lidera husi Sr. Ian Martin, hamutuk ho Xefe UNMIT foun Srª. Ahmeera Haq no ninia adjuntu, no elementu seluk ONU nian. Ekipa nee mai Timor-Leste atu halao dialogu ho lideransa no elementus sosiedade sivil Timor-Leste nian kona-ba futuro Misaun Nasoens Unidas iha Timor-Leste.
Iha entrevista ho jornalista sira banhira enkontru ramata tiha, Dr. Alkatiri hatete ba jornalistas sira katak enkontru nee positivu no produtivu tebes, tanba oportunidade diak ba nia nudar Eis-Primeiru-Ministru no governante ho experiensia maka´as, no mos nu´udar Sekretariu Jeral partidu FRETILIN, neebe partidu historiku iha rain neé no partidu ida nebe bo´ot liu hotu iha Timor-Leste, atu kontribui tan ba prosesu harii, paz, estabilidade no desenvolvimentu iha rai Timor-Leste.
"Ekipa ida neé liderada husi ema ida nebe ita hotu hatene, Sr. Ian Martin, belun diak Timor-Leste nian hori uluk kedas, mai foti ita Timor oan nia hanoin no visaun kona ba oinsá Nasoens Unidas bele tulun Timor-Leste tinan oin mai no tinan hirak tuir mai atu hetan paz, estabilidade no desenvolvimentu. Ekipa neé mak sei lori relatoriu ba Sekretariu Jeral ONU nian, nebe sei lori rekomendasaun ba Konselhu Seguransa ONU nian atu desidi UNMIT nia knaar ba tinan hirak tuir mai neé atu lao oinsá. Tamba neé mak importante ita fó ita nia hanoin ba sira atu bele tulun ita nia rain no povu diak liu tan no hetan duni benefisiu iha futuru", Alkatiri dehan.
Dr. Alkatiri hatutan katak, "FRETILIN sempre prontu atu kolabora ho komunidade Internasional tomak, liliu ONU, atu buka mekanizmu oinsá sira bele kontinua fo tulun nebe ita presiza atu harii paz no estabilidade, maibé hau dehan ba sira mos katak importante ita buka dalan atu labele hamosu fali dependensia psikolojika povu nian ba tulun hosi Komunidade Internasional. Sira bele fo tulun atu dezenvolve ita nia instituisoens no ema Timor-Leste ninia kapasidades, nunee aban bairua ita bele moris iha paz, ho estabilidade no bele halau programa desenvolvimentu neebe hasai lalais ita nia povu husi kiak."
Dr. Alkatiri informa mos ba jornalistas sira katak, nia ho ninia komitiva, neebe komposta mos husi Vice-Presidente Partidu FRETILIN nian, Deputado Arsenio Bano, no Deputado José Teixeira, no Sr. Filomeno Aleixo Assesor ba Eis-Titular/Eis PM, diskuti mos kona ba reforma ba sektor seguransa no defesa, justisa, kombate kontra KKN, desenvolvimentu humanu, desentralizasaun, eleisoens munisipais nian, no oinsá atu evita konflitu no harii dame no estabilidade.
"Ami fó FRETILIN nia hanoin kona ba assuntu barak no oinsá ONU bele fo tulun atu hadiak sektor balun no atu garante governasaun ida nebe diak tebes. Hau hatete ba sira katak ita presiza hetan consensus nasional kona ba area balun hanesan divizaun administrativa, reforma sektor defesa no seguransa, no sektor justisa, hodi harii no hametin instituisoens neebe povu tomak bele fiar no nebe halao sira nia knaar ho respeitu ba estadu de direitu demokratiku. Hau dehan katak hau preokupadu tebes ho situasaun nebe orgaun soberania la hatudu respeitu ba malu no halo interferensia oioin ba malu. Neé tenke iha mudansa."
"Kona ba ONU nia mandatu, ami FRETILIN mos konkorda kata presiza duni hanaruk tan mandatu ba tinan ida, no toó tinan 2012 ita sei presiza atu hare ho diak, ho kuidadu situasaun seguransa no estabilidade iha rai laran, no depois mak ita sei halo avaliasaun fali atu hare se ita presiza sira nia prezensa nafatin ka lae," Alkatiri deklara.
BA INFORMASAUN TAN; FAVOR DERE BA SR. FILOMENO ALEIXO IHA 734 0383
