Sekretariu Jeral FRETILIN Dr. Mari Alkatiri fo benvindas ba Xefe UNMIT foun

Dili, 07 Janeiru 2010

Horseik loron 6 Janeiru 2010 Sekretariu Jeral FRETILIN nian simu Representante Espesial Sekretariu Geral Nasoesn Unidas iha Timor-Leste foun, bainhira nia halo visita kortesia ba residensia ofisial Dr. Mari Alkatiri iha Farol. Senhora Ahmeera Haq foun kona ain iha rain Timor-Leste hodi bainrua no horseik hasoru malu kedas ho Prezidente Repúblika Ramos Horta no tuir mai kedas hasoru malu ho Dr. Mari Alkatiri nudar Sekretariu Jeral FRETILIN nian.

Maske ida neé visita kortesia SRGS foun neé ho Dr. Alkatiri koalia kona ba assuntu balun nebe importante ba Nasaun no Povu Timor-Leste.

"Ami koalia kona ba assuntu nebe bele lori paz, estabilidade no desenvolvimentu iha rai Timor-Leste, liliu oinsa Partidu istórico no maioritariu FRETILIN sempre pronto hodi uluk kedas atu fo kontribuisaun ba paz, estabilidade no desenvolvimentu iha ita nia rain", temi Dr. Alkatiri.

Durante reuniaun Senhora Ahmeera Haq hetete ba Dr. Alkatiri katak "Povu no Nasaun Timor-Leste iha sorte boot tamba iha Partidu hanesan FRETILIN nudar oposisaun no lider oposisaun ida hanesan Dr. Alkatiri, tamba FRETILIN hatene no hatudu ona halo oposisaun ho paz sem kaer violensia", katak FRETILIN laos hanesan oposisaun balun iha rai seluk nebe nia servisu molok mai Timor-Leste.

Dr. Alkatiri reforsa nia mensagem katak FRETILIN sempre iha konviksaun atu harii paz, estabilidade no desenvolvimentu iha Nasaun Timor-Leste, no sempre laran nakloke ba no hakarak servisu ba paz, estabilidade no desenvolvimentu povu Timor-Leste nian.

"Hau repete ba nia katak FRETILIN sei halo buat hotu atu dekada 2010-2020 sai dekada ba paz, estabilidade no desenvolvimentu ba povu no Nasaun Timor-Leste tomak. Srª Haq reforsa katak oposisaun forte no kredivel hanesan FRETILIN halo dadaun no halo hodi 2007, importante tebes atu harii sistemas no instituisaun governasaun nebe forte no nebe povu tomak bele fiar. Hau konkorda ho nia no hateten ba nia katak importante ita hotu servisu atu reforsa justisa no tenke hakotu sentidu impinudade atu nuneé ita bele hametin paz, estabilidade no desenvolvimentu.

"Hau moos reforsa katak FRETILIN lakohi partidu se se deit bele usa forsas armadas ka polisia nasional atu buka hetan sira nia objektivus polítikus. Tamba neé mak prioritáriu atu reforma sektor seguransa no defesa. Ita presiza hetan konsensus nasional atu halo reforma ba sektor defesa no seguransa, maibé moos ba reforma iha sektor justisa no administrasaun públika, hodi hetan governasaun nebe mak diak".

Kona ba papel UNMIT nian to´o tinan 2012, hau hatete ba nia katak Timor-Leste sei presiza apoius husi komunidade internasional, maibé tempu to´o ona nebe ita presiza hetan mekanismu oinsa assistensia internasional neé bele kontinua maibé labele hamosu fali dependensia ba komunidade internasional. Hau kontente hatene husi Srª Haq katak Nasoens Unidas prontu atu kontinua fó apoiu fundamental iha sektor seguransa", Alkatiri reforsa.

Lider Partidu istóriku FRETILIN no SRSG foun konkorda atu halao enkontru dialogu no konsulta ho malu semanalmente.

"Ida neé importante katak FRETILIN nebe Partidu maioritariu no oposisaun de faktu tenke halo dialogo nafatin ho Xefe UNMIT hanesan ami halo uluk kedas ho Senhor Atul Kare no UNMIT. Hau hein katak FRETILIN sei kontinua fó kontribuisaun atu mantein nafatin paz no estabilidade iha Timor-Leste no atu fó apoius ba Nasoens Unidas no Komunidade Internasional halao sira nia mandatu iha Timor-Leste", dehan Dr. Alkatiri.

Se presiza informasaun ruma tan favor ida dere ba Deputadu José Teixeira: 728 7080