Escrito por: CJITL Editor
Dili flash, Tenente koronel Falintil Força Defeza Timor-Leste-FFDTL nain ha´at, Falur Rate Laek, Filomeno Paixão, Pedro Klamar Fuik no Maunana hetan promosaun deviza ba Koronel.
Seremonia hasa´e deviza neé halo iha kuartel Metinaro, Dili.
Komandante F-FDTL Maijor Jeneral Taur Matan Ruak hateten koronel nain ha´at nebe mak sei simu promosaun foun neé mak sei toma konta ba komponente F-FDTL sira.
"Koronel sira neé mak sei toma responsabiliza ba ami nia komponente, dehan Maijor Jeneral Taur ba jornalista sira hafoin hasoru malu ho Prezidente da Republika José Ramos Horta, iha Palasio Presidensial Nicolau Lobato Dili".
Alende neé koalia kona ba serimonia promosaun, Maijor Jeneral Taur dehan sira mos koalia kona ba situasaun Siguransa nasaun nian injeral.
Hatan ba jornalistas kona ba prosesu kapturasaun ba autor ta´a kanek membru F-FDTL ida iha Bairo Kulau, Maijor Jeneral Taur hateten neé responsabilidade polisia nian.
Nia espera katak polisia bele kaer lalais suspeitu nebe konsege ta´a kanek membru F-FDTL tamba konhese hela atu nune´e bele prosesu tuir lei nebe vigora iha nasaun Timor-Leste.
"Polisia iha kapasidade ema ida neé porke vitima hatene", dehan nia.
Taur informa mos ba jornalista sira kona ba ro rua nebe mak governu sosa husi xina hodi fo ba F-FDTL.
Nia dehan ro rua neé sei toó iha Fulan Marsu tinan neé hafoin membru F-FDTL nain tolu nulu resin nen (36) mak tuir namanas hela treinamentu manutensaun ro neé iha xina.
Elementus naval F-FDTL sei fila hikas iha Fulan Fevreiru nia laran. (Edited news Timor Post 15/Jan).
