KOMUNIKADU BA IMPRENSA
Dili, 15 Setembru 2009
Chefe Bancada Parlamentar FRETILIN hatama Mosaun Censura ida tuir artigu 111 Konstituisaun RDTL hasoru desizaun ilegal no inkonstitusional Governo de facto AMP, bainhira hasai prizioneiru Maternus Bere husi prizaun Becora iha loron 30 fulan Agostu. Bere dadur iha prizaun Becora tamba Tribunal Distrital Suai fo’o orden nia tama prizaun preventiva , hein prosesu tuir mai, ba kazus allegasoens krimes kontra umanidade.
Maternus Bere komandante milisia ne’ebe responsavel ba masakre Suai ne’ebe hamate ema atus rua iha 1999. Nia hetan prisaun preventiva tuir ordem Tribunal nian. Bainhira sira hasai nia husi Komarka Becora iha loron 30 Agostu 2009, sira viola lei no konstitusau. Tuir informasaun ne’ebe Bancada FRETILIN hetan ordem ne’e mai husi PM de facto ba nia Ministra Justica de facto. Presidente Tribunal Rekursu hatete ona katak la iha Tribunal ida ne’ebe fo sai ordem atu hasai prisioneiru ne’e . Tamba ne’e prosesu hasai Maternus Bere ne’e ilegal no krime tuir artigo 245 Kodigu Penal Timor- Leste nian, no se se deit mak hasai husi komarka ne’e ilegal, bele hetan pena prisaun tinan 2 to’o 6.
Ministra Justisa hatete ona ba media katak desizaun liberta Bere ne’e “desizaun estadu” no desizaun Politika.” Maibe Guterres hateten katak So desizaun husi Tribunal ne’ebe iha kompetencia ba materia prosesu ne’e, maka ita bele konsidera nudar desizaun estadu nian.
Guterres dehan katak, responsablidade Kriminal ne’e Tribunais deit mak iha kompetensia atu determina, maibe Parlamentu Nasional mos iha kbi’it nudar orgaun fiskalizador ba lalaok Governo nian atu buka resposablidade politika husi governo, tamba klaru ona tuir PM nia Deklarasaun rasik katak sira rekoñese viola lei no konstituisaun.
“Governo hatama nia kanuru tohar ba Tribunal nia kompetensia .Governo halo interferensia ba lalaok justisa nian. Sira viola lei, hanesan presidente Tribunal Rekursu deklara ona, investigasaun husi Juiz Inspector Conselho Superior Majistratura nian atu halao, no tuir mai sei rekomenda ka lae sansaun Kriminal disiplina , hasoru se deit maka responsavel , maske iha investigasaun judicial, tenke mos iha prosesu responsablidade ba politika Governo nia . Atuasaun ne’ebe sama vitimas nia direitu no prinsipiu estadu de direitu no separasaun poderes nian.Tamba ne’e mak Bancada FRETILIN hatama Mosaun Censura,”Guterres hatutan.
Xefe Bancada FRETILIN husu debate bele halao iha tempu badak, hodi rona governo nia esplikasaun bainhira sira mai defende a’an hasoru Mosaun ne’e. “Asuntu hasai Bere husi Komarka ne’e mosu nudar polemika bot ida no foti kestaun justisa no Estadu Direitu sai assuntu bot liu iha ita nia rain. Maske Proponentes Mosaun hein katak maioria sei nafatin vota kontra mosaun no fo protesaun ba governo, importante mos ba futuru justisa no estadu de direitu democratiku atu halao debate ida ne’e,” Guterres taka.
Ba informasaun tan dere ba Sr. Deputadu Aniceto Guterres iha + 670 723 8569.
