.JPG)
MOSAUN CENSURA
Bazea ba artigu 111 Konstituisaun Republika Demokratika Timor Leste no Artigu 134 Regimentu Internu Parlamentu Nasional nian, deputadus sira nebe asina iha okos aprezenta tuir mai mosaun censura ba Governu:
Libertasaun Martenus Bere hetan ona rekonesimentu husi membrus Governu, liu husi deklarasaun iha media komunikasaun social, nudar desizaun politika nebe hotu-hotu tenke respeita.
Martenus Bere, komandante milisia Laksaur, responsavel ba masakre Suai nebe hamate ema nain atus rua, hahalok-aat nebe mosu bainhira halao referendum ba independensia Timor Leste, nebe halo ona tinan sanolu, hetan libertasaun liu hosi aktu politiku, lao’os prosesu judicial.
PM rasik iha nia deklarasaun ba media komunikasaun social iha semana ikus, hatente katak nia maka fo’o ordem hasai Martenus Bere husi Kadeia Bekora, la liu husi prosesu judicial, no nia simu responsabilidade tomak ba ida ne’e.
Presidente Konsellu Superior Magistratura Judusial no Tribunal Rekursu Timor Leste rasik desidi ona fo’o ordem halao investigasaun ba “kazu Bere”, hodi buka hare, karik iha duni libertasaun illegal, atu hahu halao prosesu penal no disiplinar ida.
Situasaun aktual tenke hare iha kontextu nebe luan liu, ba vontade Governu no PR atu aprezenta proposta amnistia ba krimes hotu-hotu nebe halao iha Timor Leste hahu tinan 1974 to’o ba oin loron.
Liu tia pedido explikasaun husi deputadus sira ba Governu, nebe Governu la mai hodi esklarese ba buat nebe oras ne’e dau-daun akontese, Parlamentu hetan deit informasaun liu husi media komunikasaun social, ne’e konsidera katak Governu la iha respeitou itoan ba orgaun soberania ida ne’e no tribunal sira, nune tau iha kauza prinsipiu demokratiku importante separasaun poder, tuir artigu 69 Konstituisaun Republika Timor Leste nian, nebe Konstituisaun rasik artigu 156 alinea d) tau baliza ba nia revizaun material.
Desizaun Governu hodi haruka hasai husi kadeia Bekora Sr. Martenus Bere hatudu momo’os kontra hasoru Konstituisaun RDTL no Lei sira nebe oras ne’e vigora iha ita nia rain. Tribunal deit maka iha kompetensia hodi haruka ema tama ka hodi liberta sidadaun naran ida deit, nebe hetan akuzasaun krime ka hetan tia ona sentensa.
Tanba ne’e, so desizaun husi Tribunal nebe iha kompetensia ba materia prosesu ne’e, maka ita bele konsidera nudar desizaun estadu nian. Atu prova, hanesan buat hotu hatudu katak lao’os Tribunal ida maka fo’o ordem hasai Sr. Bere, entaun se’e maka disidi hasai Sr. Bere ne’e illegal, ne’e viola ita nia Konstituisaun, Kodigu Penal no Prosesu Penal RDTL nian.
Bainhira Governu ida halo aktu nebe la respeita Parlamentu, la respeita Tribunal, viola Konstituisaun no viola Lei nebe vigora iha ita nia rain, Governu ne’e la iha ona kondisaun atu dirizi destinu nasaun nian, tamba ne’e merese ita nia censura.
