REPÚBLICA DEMOCRÁTICA TIMOR LESTE
PARLAMENTO NACIONAL
BANCADA PARLAMENTAR DE FRETILIN
PARLAMENTO NACIONAL
BANCADA PARLAMENTAR DE FRETILIN
DEKLARASAUN POLITIKA
SEGUNDA FEIRA, 24 AGOSTU 2009
Sr. Presidenti Parlamentu.
Illustres colegas deputadu sira.
Illustres colegas deputadu sira.
Ohin bancada FRETILIN hakarak foti kestaun ida neebe Media Filipinas foin publika kona ba Komissaun Anti Korrupsaun Filipinas nian, halau investigasaun hasoru Komissariu Edukasaun Pos Sekundariu Sr. Emmanuel Angeles, tamba nia viola Lei Anti Corrupsaun Filipinas nian.
Tuir Agensia Noticias Filipinas nian ABS-CBN News, no tuir informasaun neebe bancada FRETILIN simu husi nia collaboradores sira iha Filipinas, allegasaun neebe Komissaun Anti Korrupsaun Filipinas hetan husi sidadaun ida neebe preokupa ho kazus estudente bolsistas Timor oan, nain tolunulu resin neen neebe matricula no inscreve iha Universidade Fundasaun Angeles, iha Cidade Angeles.
Tuir informasaun estadu RDTL selu ba universidade ida nee, dolar Amerikanu rihun rua nulu resin rua ba sira estuda iha Universidade ida nee. Maibe realidade mak Universidade nee, Sr Emmanuel Angeles, Komissariu Edukasaun Pos Sekundariu nia familia nian, no tuir lei nia hetan benefisiu diretu.
Kestaun ida nee sai eskandalu boot iha Filipinas oras nee dadaun. Tuir agensia noticias ABS-CBN News, universidade nee inscreve estudantes tolunulu resin neen husi Timor-Leste. Sira hetan estudantes barak liu husi estudantes Timor Oan hotu neebe ba estuda no sira simu osan dolar Amerikanu mais ou menus atus hitu, sianulu resin neen bolsista ida idak. Estadu Timor-Leste mak selu osan nee ba Universidade ida nee.
Ba bancada FRETILIN kestaun nee seriu tebes tamba hatudu katak estudante sira hetan fatin iha instituisaun ida nee, tamba ema boot ida nia familia nian, laos tamba instituisaun ida nee diak. Bancada FRETILIN ezigi katak kestaun ida nee tenke investiga klean. Tamba nee osan boot no iha relasaun ho futuru estudantes sira nian.
Kazu nee hatudu ona indikasaun forte linha orientadora nakonu ho manipulasaun ida neebe halo ita hotu preokupa ho kestaun estudante sira seluk neebe ba estuda iha Filipinas. Se los mak hetan benefisiu finanseiru husi manipulasaun bolsas hirak nee. Tamba total estudantes atus ida resin sia maka estuda oras nee iha Filipinas, Estadu gasta hamutuk osan US$. 2,332 milloens dolares.
Projetu ida nee sai hanesan publisidade bot ba governu de facto AMP nian, iha rai laran, hodi promove aan. Agora ita rona katak iha manipulasaun KKN husi nivel aas iha Filipinas, relasiona ho Universidade Fundasaun Angeles.
Maibe, Sr Komissariu Angeles la konsegue haruka bolsistas Timor oan ba ninia universidade, no hetan benefisiu finanseiru husi projetu ida nee, se Ministru balun iha governu de facto AMP nian no Diplomatas balun iha Filipina, inklui mos Embaixador, la tama iha prosesu nee nia laran mos.
Tamba nee, mak kestaun nee tenke investiga, tamba tuir investigasaun bancada FRETILIN nian iha Filipinas rasik, liu husi Timor oan balun no ema Filipinos neebe iha interese luta hasoru KKN, iha kestaun grave barak neebe mosu husi atividades diplomatas Timor oan iha neeba, neebe em ves de halo diplomasia, halo business mak barak. Bancada FRETILIN hetan provas balun ona, no iha tempu ida bancada FRETILIN sei lori prosesu nee ba oin.
Tamba nee, mak kestaun nee tenke investiga, tamba tuir investigasaun bancada FRETILIN nian iha Filipinas rasik, liu husi Timor oan balun no ema Filipinos neebe iha interese luta hasoru KKN, iha kestaun grave barak neebe mosu husi atividades diplomatas Timor oan iha neeba, neebe em ves de halo diplomasia, halo business mak barak. Bancada FRETILIN hetan provas balun ona, no iha tempu ida bancada FRETILIN sei lori prosesu nee ba oin.
Sr. Presidenti, Colegas Illustres Deputadus, Povo maubere.
Bancada FRETILIN hakarak husu informasaun husi Ministru Negosius Estrangeirus, Primeiru Vice Primeiru Ministru, no Ministru Edukasaun husi Governu de facto AMP: bainhira assina akordu atu haruka estudante sira ba Universidade Fundasaun Angeles, sira hatene katak instituisaun ida nee iha ligasaun ho Komissariu Edukasaun Pos Sekundaria Filipina nian Sr. Emmanuel Angeles ka lae? Bancada FRETILIN husu ida nee, tamba tuir reportagen iha media Timor Leste desde formasaun Governu de facto AMP, governantes tolu nee mak envolve ho projetu bolsa estudus ba Filipinas. Resposta ba kestaun nee importante tebes, atu ita hotu bele hatene tamba sa mak hili universidade ida nee, no se mak hetan benefisiu, estudante bolsistas ka boot ruma?
Bancada FRETILIN husu mos Provedoria Direitus Humanus no Jusitsa Timor-Leste nian buka halo ligasaun ho Ombudsman anti Korrupsaun Filipinas nian atu akompanha sira nia investigasaun no halo koordenasaun kedas atu investigasaun bele hetan kooperasaun maximu.
Ema balun bele husu tamba sa mak haruka ba Provedor, la hein Kommissaun Anti Korrupsaun? Tamba Tuir bancada FRETILIN nia hanoin, PDHJ Timor-Leste nia funsaun hanesan Ombudsman Anti Korrupsaun Filipinas nian. No mos tamba Kommissaun anti Korrupsaun Timor-Leste sei precisa tempu naruk, atu hetan kapasidade hanesan PDHJ iha ona oras nee, no KAK sei la konsegue akompanha servisu investigasaun neebe halao ona iha Filipinas.
Ema balun bele husu tamba sa mak haruka ba Provedor, la hein Kommissaun Anti Korrupsaun? Tamba Tuir bancada FRETILIN nia hanoin, PDHJ Timor-Leste nia funsaun hanesan Ombudsman Anti Korrupsaun Filipinas nian. No mos tamba Kommissaun anti Korrupsaun Timor-Leste sei precisa tempu naruk, atu hetan kapasidade hanesan PDHJ iha ona oras nee, no KAK sei la konsegue akompanha servisu investigasaun neebe halao ona iha Filipinas.
Ho ida nee mak investigasaun bele klean no kompletu, hodi investiga se se deit mak halo manipulasaun illegal, atu hetan benefisiu privadu, husi projetu ida nebe atu benefisia ita nia futuru gerasaun.
