PARLAMENTO NACIONAL
BANCADA PARLAMENTAR FRETILIN
Sr. Presidenti em exercisiu,
Illustres deputadus,
Povo Maubere tomak.
Ema barak iha preokupasaun katak ita nia rai Timor-Leste iha dadaun krize konstitusional nia laran. Krize konstitusional tamba iha orgaun soberania balun neebe sama konstituisaun no la preokupa. Tanba la respeita orgaun soberania sira seluk nia knaar no independensia.Viola lei maibe nunka preokupa.
Ita iha parlamentu mak sai vitima dalan barak ona ba violasaun leis, konstituisaun no ita nia knaar nudar orgaun soberanu neebe tenke preokupa, la preokupa fali, tamba maioria iha uma fukun ida ne’e nia laran la preokupa.
Iha tinan 2008 bancada FRETILIN hamutuk ho partidu seluk aviza ba governu de facto katak proposta orsamentu retifikativu nakonu ho inkonstitusionalidade no ilegalidade. Maibe Arrogansia Maioria Parlamentar lakoi rona, dudu nafatin ba oin ho proposta fundu estabilizasaun ekonomika no hasai osan barak liu husi fundu mina rai.
Ikus mai tribunal rekursu deklara illegal no inkonstitusional, maibe em vez de respeita decizaun tribunal nian, nudar orgaun soberania ida, no hanesan halo iha estadu de direitu democratico, sira neebe halo illegalidade no inkonstitusionalidade hirak nee kritika no buka halo retribuisaun ba tribunal no juiz sira, liliu Juiz Ivo Rosa. Buka atu hasai nia, maibe manipulasaun iha conselho superior majistratura atu la renova contrato Juiz Ivo Rosa hetan fali deklarasaun ilegalidade husi tribunal Timor oan tolu. Buka atu hasai Presidenti Tribunal Rekursu.
Hahalok ida nee tuir relatorio neebe publika iha fulan liu ba Juiz Americano no nia ekipa neebe mai halo avaliasaun ba judisiariu iha ita nia rain dehan katak kazus la renova Juiz Ivo Rosa nia kontratu nee mosu nudar interferensia seriu no preokupante ba independensia judisiariu. Ekipa ida nee nia relatorio temi mos kazu milisia neebe Primeiru Ministru de facto halo confessaun ba publiku tomak katak nia mak responsavel hasai ilegalmente husi tribunal Marternus Bere.
Sr. Presidenti,
Illustres deputadus,
Povo Maubere.
Bancada FRETILIN nia preokupasaun mak nee; bainhira iha ilegalidade ka inkonstitusionalidade ruma neebe sai polemika publiku iha ita nia rain kona ba ukun nain sira nia hahalok, sira buka soi rai rahun ho atuasaun seluk neebe hakat liu lei atu taka sira nia hahalok. Sira buka soi rai rahun ba Povo nia matan. Hanesan ita hotu hare dadaun ho eskandalu bot neebe mosu iha ita nia rain dadaun ho naran “Pakote Referendu”.
Conseitu programa referendum nee mosu iha media, tamba buat hotu mosu iha media deit, no ita nudar representantes iha uma fukun nee nunkarona buat ida husi governu de facto nee, tamba sira nia arrogansia sira nunka mai hatan ka esplika buat ida iha nee neebe ita buka esplikasaun, bancada FRETILIN kestiona makas legalidade pakote ida nee.
Bancada FRETILIN no ema barak kestiona tamba maske detalhus la barak, ema hotu hatene ona katak osan neebe atu hodi halau pakote nee mai husi orsamentu sentral Electriku oleo pesadu nian neebe la gasta. Orsamentu atu mai husi Ministeriu Infraestrutura neebe too loron 1 Setembru 2009 iha ezekusaun orsamanetal foin 7.3% deit. Tamba Guvernulakoi mai iha nee debate orsamentu husu ratifikativu atu labele iha“carryover”, entaun buka, manobra tun sai atu hetan dalan atu gasta lalais liu. Dalan nee tuir lei ka lae sira la interessa.
Tanba nee mak agora mosu “Pakote Referendu”nebe Ilegal, tamba iha deit Referendum ida deit neebe legal, iha tinan 1999. Referendu agora dadaun nee illegal. Illegal primeiru tamba osan neebe atu uja nee transfere ilegalmente husi dotasaun orsamentu geral estadu neebe labele transfere. Kapital desenvolvimentu ba oleo pesadu labele foti ba halo buat seluk, hanesan halo ho pakote nee.
Illegal segundu tamba la iha consurso publiku ba porjetos, tamba fahe deit tuir ema nia hakarak. Aat liu, tamba laos governu mak fahe, maibe ema privadu mak fahe fali. Hahalok ida nee hanesan Lei Aprovisionamentu la iha ona iha rai ida ne’e.
Illegal terseiru, tamba osan estadu, estadu mak halo gestaun. Laos selu osan tomak ba projetus liu US$34 milloens ba entidade privadu ida no ikus mai entidade nee mak selu fali ba sira neebe halo projetus individuais.
Bancada FRETILIN afavor ba politika hakbiit empresariu nasionais sira atu bele hasai sira nia kapasidade no profisionalsimu, hodi sai nudar parseiru ba dezenvolvimentu nasional, no sai uma nain iha ita nia rain rasik, maibe programa ida ne’e tenki aprova iha Parlamentu Nasional. Ami kontra programa pakote referendum hanesan agora dadauk halao, laos deit tamba ilegal, maibe mos, tamba hela deit fulan tolu remata anu fiskal. Politika ida hanesan ne’e sei la mai hakbiit empresariu nasional, kontrariu fo karik tali atu tara sira nia kakorok. Tamba Guvernu deklara katak to 31 Dezembru 2009, karik la remata projeitu sira ne’e maka kompanias sira ne’e sei tama iha Black list.
Sr. Presidente,
Illustres deputadus,
Povo Maubere.
Iha governasaun tinan rua governu de factu ida ne’e ami simu keixa barak husi empresariu nasionais katak projetu hotu-hotu maior parte barak liu fo deit ba empresariu estranjeirus, agora atu remata ona tinan fiskal, maka governu mai deklara katak hanoin tebtebes empresariu nasionais atu fo kbiit ba sira, mak hamosu program pakote ida ne’e.
Uluk kedas, bancada FRETILIN no seluk ezigi governu atu mai esklarese, maibe too ohin loron la iha esklaresimentu ida mak mai husi governu de facto. Maibe nee biasa ona, tanba governu nunka hatan ba Povo nia representante. kaju Salariu bot ba assessores iha ministeriu finansas la mai hatan. Oleo pesadu la hatan. Sosa ro patrulha husi Xina lamai hatan. Osan neebe selu ba eis titulares la mai hatan. Kazu hasai milisia assassinu la mai hatan.
Agora pakote referendu mosu nudar problema bot maske obras barak mak seidauk hahu. Bancada FRETILIN sim u ona keixa barak. Bancada FRETILIN rona ona katak iha manipulasaun barak, hanesan projetu neebe halo ona husi ONG sira mos sai fali projetu iha pakote laran, 20% adiantamentu selu ona, no projetu nee mos sei mosu nudar projetu ida neebe sei selu husi pakote nee nia orsamentu illegal nudar projetu klamar.
Sr. Presidenti,
Illustres Deputadus,
Povo Maubere.
Ema barak mos rona ona katak pakote referendu illegal nee mosu konflitu iha governu laran mos. Ema rona ona katak Ministra Finansas mos aviza ona ba Sr Primeiru Ministru de facto katak hahalok nee mos illegal, maibe dalan ida tan nia hatan “hau hatene dalan ba Becora liu husi neebe”.
Balun hatete Sr Presidenti deklara ne’e desizaun estadu, maske iha ona krime konfesadu husi Primeiru Ministru de facto katak nia mak halo krime nee no sei responsabiliza. Se desizaun estadu bancada FRETILIN husu, ezigi, parlamentu nia desizaun iha neebe? Resolusaun iha neebe? Tamba ita iha uma fukun nee orgaun coletivu no la iha desizaun ida neebe ema ida ka rua deit mak bele halo, ita hotu mak envolve. Dalan ida tan, resolusaun husi plenaria konkorda ho ida neebe bolu “desizaun estadu” nee iha neebe? La iha mak nee. Tamba la iha desizaun estadu. Nee manobra ida deit, atu soi rai rahun ba Povo no ema seluk nia matan.
Tribunal dehan ona sira la halo desizaun. Parlamentu la halo resolusaun. Entaun se mak estadu? Ita nia organu nee, ho Governu, ho Presidensia, ho Tribunais, ka Primeiru Ministru ho Presidenti Republika deit? Se mak hanoin hanesan nee dishonesto duni no bosok ba Povo.
Bancada FRETILIN dalan ida tan deklara pakote referendu ne’e illegal no tenke para atu labele estraga ita nia rain nia imagen iha regiaun no mundu. Investidores seirus no loloos sei lakon konfiansa iha ita nia sistema governsaun tamba la transparenti no la respeita justica,.So sira neebe buka halo negosiu ho KKN mak mai. So sira nebe hakarak Timor Leste hodi fase osan mak sei mai. Ita tenke kuidadu makas,tamba hahalok sira hanesan pakote illegal nee mak sei la husik ita bele konvense kompanhia sira tau dada kadoras Greater Sunrise mai iha nee. Se mak hakarak ba investe iha rain ida neebe nakonu ho ilegalidades no manipulasoens.
Hanesan deputadu ida dehan horseik, ita ukun laos ba ohin deit, maibe ba futuru. Buat neebe ita halo agora sei iha impaktu makas ba aban bainrua estadu ida ne’e. no sei iha impaktuba ba estabilidade no dezenvolvimentu aban bain rua.
Informasaun kompletu Kontaktu SF. Media Officer : 7345 195
