Timor Post, 19 Outubru 2009
DILI- Governu Indonezia liu husi ninia embaixada iha Dili rejeita makas informasaun nebe dehan sidadaun Indonezia sira, liu – liu eis sidadaun Timor Leste nebe hela iha Atambua, Kupaun, taka fronteira rai rua nian no halao rajia ba sidadaun Timor Leste sira nebe maka iha Atambua.
Ba Timor Post iha embaixada Indonezia iha Farol, Dili, (18/10), Primeiru Sekretariu ba asuntu Politiku,Victor Josef Sambuaga informa katak informasaun ne’ebe espalha iha komunidade no publika iha media balun katak sidadaun Indonezia, liu –liu eis Tim-Tim taka fronteira no halo rajia ba sidadaun Timor oan iha fronteira no Atambua Indonezia la los.
Victor hateten, tuir konfirmasaun ne’ebe sira hetan husi autoridade ne’ebe kompetente iha Atambua indereta no mos koordenasaun ho komando militar sira, komando polisia no parte forsa seguransa TL nian katak laiha indiksaun ida konaba aktividade rajia husi eis sidadaun Timor-Timur ne’ebe hela iha Indonezia espesialmente iha distritu Atambua, provinsia Kupaun.
“Relasiona ho problema ne’ebe ami rona iha loron hirak liu ba iha povu nia let no fo sai iha media (balun) katak iha posibilidade sidadaun Indonezia eis Tim -Tim ne’ebe hela iha Atambua espesialmente iha distritu Belu, Nusa Tengara Timur ba too Kupaun taka fronteira no halo rajia ba sidadaun Timor oan iha Indonezia.
Ami rona no hetan pergunta barak husi kolega sira iha ne’e liu-liu husi parte governu konaba rumores ne’ebe konaba atitudi sidadaun Indonezia eis Tim-Tim ne’ebe tuir informasaun katak halo rajia ba Timor oan sira ne’ebe halao viazen liu husi fronteira.
Iha kestaun ne’e, ami hasoru ona diretamente ho autoridade ne’ebe kompetente iha Atambua ne’ebe indereta no to’o agora ne’e la iha indikasaun katak iha aktividade hanesan halo rajia tanba ne’e bele hateten katak ne’e hanesan rumoris deit”, dehan Victor.
Victor mos haktuir katak tuir lei ne’ebe vigora iha Indonezia kuandu iha asaun hanesan demostrasaun no seluk tan tenki liu husi prosedur ida katak sira tenki halo lisensa ba iha polisia.
Portantu too agora seidauk iha grupu ida maka hatoo surat ba polisia atu halao asaun ruma hanesan demostrasaun. No iha terenu mos hatudu katak la iha buat ida maka akontese iha fronteira too iha Atambua no Kupaun.
Konaba atu taka fronteira, Victor hatan katak ne’e laos prosedur ne’ebe fasil katak ema bele taka fronteira konforme nia hakarak.Tanba, dehan nia, husi parte Indonezia nian iha ekipa forsa militar Indonezia nian ida maka fo seguransa ba fronteira. Ne’ebe iha kestaun ne’e, sira hanoin povu Timor Leste liu-liu sira ne’ebe atu desloka ba Atambua liu husi fronteira la bele paniku no tauk.
Entertantu iha parte seluk, atu antisipasaun rumoris nebe espalha ne’e, Victor hateten husi parte embaixada Indonezia iha Dili I husu ona ba parte forsa seguransa Indonezia nian iha atu fo atensaun seriu liu ba areia importante sira hanesan iha Mota Ain. (dam)
