BANCADA PARLAMENTAR DA FRETILIN
KOMUNIKADU BA IMPRENSA
Dili, 2 Outubru 2009
Maske de facto Primeiru Ministro Xanana Gusmao koalia barak kona ba hakarak luta hasoru KKN, realidade oin seluk, tamba liu ona loron neenulu resin neebe tuir Lei Anti Korrupsaun governu tenke nomeia Kommissariu liu tiha ona, maibe governu seidauk hatan ho proposta naran ema ida ba parlamentu nasional. Ida nee tuir deklarasaun husi Xefe Bancada FRETILIN nian, Sr. Aniceto Guterres ohin ba jornalista sira iha Dili.
Tuir Aniceto, Bancada FRETILIN hanoin katak atrazu nee husi Governu laos tamba ema la iha maibe tamba Bloku AMP hakarak halo nomeasaun ba ema ida neebe besik liu sira no neebe aban bairua nudar komissariu sira bele manipula tuir sira nia hakarak.
“Agora ita rona governu de facto dehan fail katak presiza halo mudansa ba lei, liliu ba kriteriu ba ema neebe bele sai komissariu. Ami la simu ida nee. Lei nee foin dadauk mak ita hotu iha uma fukun aprova ho unanimidade, depois de mudansa barak ona, no depois governu mos fo sira nia hanoin hotu. Agora mai fali dehan katak ema neebe preense kriteriu la iha, nee bancada FRETILIN la simu. Maibe laos deit bancada FRETILIN mak la simu. AMP nia lideransa rasik mos la simu ezigensia ida nee husi governu de facto atu halo mudansa ba lei”, haklaken Aniceto.
Tuir Jornal STL nia reportagem iha loron 23 fulan Setembru tinan 2009, Vice Presidenti Parlamentu Nasional nian, Sr. Deputadu Vicente Guterres deklara katak “Kriteriu Komissariu KAK Labele Muda”. Tuir reportagem nee nia dehan mos: “hau la fiar namadigas husi ema Timor milaun ida, nein ida maka prense kriteriu. Tamba nee ami sei mantein kriteriu nee”.
Sr. Guterres hatutan katak tuir nia hare, parlamentu “sei la muda Kriteriu tamba komissariu KAK labele ema neebe foin akaba nia lisensiadu ba direitu”.
Aniceto dehan mos katak deklarasoens hanesan ida nee husi Vice Presidenti PN halo bancada FRETILIN no ema barak preokupa, katak governu hakarak hatama ema neebe la iha kualifikasaun ka esperiensia natoon. “Ami mos konkorda ho Sr Vice Presidenti PN nian. Iha ema barak neebe iha kualifikasoens no esperiensia natoon atu halau knaar komissariu KAK ho diak, ho independensia, integridade no tuir dever iha lei. Tamba sa la hili ema nee, no nomea nia mai parlamentu atu halo votasaun? Tamba sira hakarak sira nia ‘ema emas’ ida neebe bele investiga se se deit mak bloku AMP haruka, no se se deit mak sira lakoi investiga, KAK sei husik hela. Nee ami suspeita makas, tamba lia anin barak mos halai ona katak bele ema partidu CNRT nian rasik mos. Bele mos hanesan Sr. Vicente Guterres dehan dadaun, bele ema ida neebe la kualifikadu.
“Bancada FRETILIN ezigi nomeasaun tama mai parlamentu lalais ho base iha Kriteriu neebe iha lei dadaun, no ami lakoi hare manipulasaun nem itoan. Sei lae ami sei usa ami nia votos atu veta eleisaun ba ema neebe la kualifikadu, la independenti no la iha experiensia. Se sira hakarak manipula hanesan nee, entaun sira mak sei responsabiliza ba atrazu ba servisu seriu neebe KAK presiza halau lalais kedas, tamba provas barak mosu dadaun katak KKN buras ba bebeik iha ita nia rain”, Aniceto taka.
BA INFORMASAUN TAN DERE MAI MEDIA OFFICE FRETILIN: +670 728 7080
