Fo Hatene ba KS ONU oinsa ita sente kona-bá justisa

Fo Hatene ba Konseillu Seguransa oinsa ita sente kona-bá justisa!

Sira sei deskute Timor-Leste iha 23 Outubru.

Konseillu Seguransa Nasaun Unidus sei enkontru kona-bá Timor-Leste iha fulan ne’e nia rohan, iha enkontru be koñesidu hanesan debate ne’ebe nakloke, iha ne’ebe reprezentante sira husi membru konseillu 15 (haree lista iha okos) no governu seluk-seluk tan halo esteitmentu. Ba semana rua oin mai, diplomata iha Nova Iorke sei fó atensaun ba asuntu sira be involve Timor-Leste, inkluindu asuntu justisa, akuntabilidade no impunidade ba krime grave no violasaun direitus humanus ne’ebé halo durante Indonézia nia okupasaun husi 1975 too 1999.

Ba tinan barak, diplomata sira ne’e rona ona husi ulun-boot Timór-oan, inkluindu José Ramos-Horta, Xanana Gusmão no Zacarias da Costa, katak ema Timór-oan la iha interese ba justisa krime pasadu, basa nasaun ne’e iha prioridade seluk halo. Hanesan husik sai Maternus Bere foin lalais hatudu, governu Indonézia no Timor-Leste hanoin katak hakotu impunidade la importante liu dezenvolve relasaun amizade ho ema no instituisaun sira be halo ona krime grave hasoru ema Timor-Leste.

Karik ita la konkorda ho hanoin ne’e, Konseillu Seguransa ONU presiza atu rona husi ita-boot sira, tan ne’e sira iha komprensaun di’ak kona-bá Timór-oan nia pontu-da-vista. Konseillu Seguransa iha kbiit atu harii Tribunál Internasionál ida, maibé sira sei nunka halo ida ne’e karik sira fiar katak Timor-Leste lokohi ida ne’e. Ba tinan barak, ONU promete ona justisa no akuntabilidade ba krime hasoru direitus humanus ne’ebé halo ona durante Indonézia nia okupasaun, maibé sira halo oitoan de’it ekseptu repete sira-nia prinsípiu katak “impunidade tenke la buras iha fatin ne’ebé de’it.”

Karik José Ramos-Horta no Xanana Gusmão la reprezenta ema-nia pontu-da-vista kona-bá asuntu impunidade, ida ne’e oportunidade atu fo hatene ita-nia ezijensia ba justisa diretamente ba lider komunidade internasionál. Fó hatene ita boot ne’e se, ita-boot nia hanoin saida, saida mak ita boot hakarak Konseillu halo, no tamba sa. Lalika laran-taridu ba formatu ka protokolu; hakerek tuir ita boot nia kapasidade.

Karta bele halo husi individual ka organizasaun, iha lian Tetum ka Ingles, hakerek ho liman, hakerek ho makina ka haruka liu husi email. Karik karta mai husi organizasaun ida, favor tau kedas kop-surat. East Timor and Indonézia Action Network (ETAN) no International Federation for East Timor (IFET) sei halo kopia ita boot nia karta no lori ba kada membru Konseillu Seguransa iha Nova Iorke. Favor email karta ba etan@etan.org iha formatu MS Word ka Adobe PDF, ka lori mai de’it iha edefisio La’o Hamutuk iha Farol.

Favor haruka kedas ita boot nia karta wainhira ita halo hotu ona, maibé la bele kleur liu loron 19 Outobru. Keta haluhan hakerek ita boot nia naran no hela fatin.

Membru Konseillu Seguransa:

Austria

Fransa

Turkey

Burkina Faso

Japaun

Uganda

Xiña

Libyan Arab Jamahiriya

Englatera

Costa Rica

Mexico

Estadus Unidus Amerika

Croatia

Russia

Viet Nam

La'o Hamutuk (The Timor-Leste Institute for Development Monitoring and Analysis)
P.O. Box 340, Dili, Timor-Leste (East Timor)
Telephone: +670-3325013 or +670-734-0965 mobile
email:charlie@laohamutuk.org website: http://www.laohamutuk.org skype: cscheiner