Bancada Parlamentar FRETILIN
Parlamentu Nasional
Parlamentu Nasional
Dili, 24 Junhu 2009
FRETILIN husu ema hotu kumpri no respeita akordaun Tribunal Rekursu nian kona ba Autoridade Nasional Petrolifera.
Xefe Bancada Parlamentar FRETILIN nian, Aniceto Guterres ohin husu ema hotu respeita no kumpri ho akordaun Tribunal Rekursu nian neebe deklara katak la iha ilegalidade ka inkonstitusionalidade ruma neebe kona Dekretu Lei 20/2008 ka Autoridade Nasional Petrolifera.
Notifikasaun akordaun neebe bancada parlamentar FRETILIN nian simu horseik husi Tribunal Rekursu rejeita argumentus Deputadus FRETILIN nian katak iha ilegalidade no inkonstitusionalidade iha Dekretu Lei 20/2008 neebe publika iha 19 Junhu 2008.
“Deputadus FRETILIN ho laran mos hatama petisaun ba tribunal depois de halo analisis ba dekretu lei nee no depois hetan konselhu husi advogadus. Lei ida nee nunka liu husi parlamentu no la hetan ezaminasaun diak, no tamba nee ami husu fiskalizasaun husi Tribunal Rekursu tuir ami nia direitu konstitusional. Agora Tribunal Rekursu halo ona desizaun final no ami simu tomak ho laran luan. Mak nee ona tamba Tribunal mak desidi tuir sira nia knar konstitusional. Ita hotu tenki respeita no kumpri ho Tribunal nia akordaun deit-la iha dalan seluk ka hanoin seluk,” Guterres haklakan.
"Maske partidu Fretilin simu no respeitu ho Tirbunal Rekursu nia desizaun no sei kumpri desizaun, bainhira FRETILIN ukun fila fali sei kurizi sala nebe ami hare iha lei ida ne’e, atu reforsa justisa no transparansia," Guterres dehan.
Guterres hatutan katak ita tenki hatudu ita nia respeitu ba estadu de Direitu Demokratiku ho respeitu no kumprimentu ba desizaun Tribunal nian, no bainhira ita halo nunee ita kontribui ba hametin estadu de Direitu demokratiku iha ita nia rain doben.
“Akordaun nee hatudu dalan ida tan katak ita nia Tribunais independenti no kredivel duni. Akordaun nee hametin sira nia reputasaun nunee,” nia taka.
BA INFORMSAUN SELUK TAN DERE BA DEPUTADU JOSE TEIXEIRA: +670 728 7080
