Resolusaun Harii Asosiasaun Antigus Kombatentes no Veteranus Luta Libertasaun Nasional

FRENTE REVOLUCIONÁRIA DO TIMOR-LESTE INDEPENDENTE
FRETILIN

"REZOLUSAUN"

Atu Timor-Leste sai hanesan Nasaun Independente ohin loron, timor oan barak tebetebes mak fo’o ninia a’an ba luta libertasaun nasional, liu hosi esforsu ida-idak nian ka hanesan grupu kik oin’oin, instituisaun ka organizasaun bo’ot. Ne’e faktu tebes duni no ita labele nega.

Faktu tebes mo’os katak FRETILIN mak:
- Hahu mobiliza no konsiensializa povu, iha nivel nasional, atu iha espiritu patriotiku.
- Hahu no hametin movimentu Unidade Nasional.
- Hari no organiza ‘Forças Armadas da Libertação Nacional de Timor-Leste’ [FALINTIL], liman kroat povu maubere nian.
- Hahu no halao rezistensia politika no militar organizada hasoru invasaun no okupasaun indonezia liu husi frente klandestina, frente armada no frente diplomatika.
- Ninia lideransa sira nunka hakiduk husi prinsipius ne’ebe kuda iha 1974. Faktu tebes duni katak FRETILIN ninia lideres no militantes rihun ba rihun fo sira nia a’an ba mate, la tauk dadur, la tauk tortura husi militar indoneziu sira no la se’es a’an husi sakrifisiu oin’oin to’o ohin loron.

Ezemplu ida-idak nian mak haburas espiritu luta iha ida-idak ninia familia nia le’et, iha ida-idak ninia fatin moris ka ninia hela fatin. Ezemplu ida-idak nian mak halo FRETILIN haburas a’an ba bei’beik iha povu nia le’et.

Ohin, loron 20 Juñu 2009, FRETILIN hamutuk ho Asu’uain sira, iha Komoro-Dili, hanoin fila fali ba tempu difisil luta libertasaun nasional, ne’ebe lideransa FRETILIN hahu kuda iha povu nia le’et sentidu patria nian no katak ita, mauberes no biberes, husi Lautem to fronteira, liu hosi Oecusse no Atauro, ita povu ida de’it ho neon ida de’it: Ukun Rasik a’an.

Ohin ita fo hanoin fila fali difikuldades sira ne’e, hodi hametin makas liu tan ita nia espiritu luta, korajen no determinasaun atu hakat difikuldades sira ne’ebe mosu iha periodu 1974-1979, liu-liu bainhira militar indoneziu sira harahun ita nia bazes de apoiu no ita lakon 90% lideransa FRETILIN nian tamba mate iha funu laran. Ita hanoin fila fali ba periodu difisil ida ne’e, atu kuda fila fali espiritu luta, korajen no determinasaun. Ita hanoin fila fali periodu ida ne’e atu haburas fila fali espiritu Unidade Nasional ne’ebe halo ita halao luta liberasaun Nasional ho susesu. Ita hanoin fila fali periodu difisil ida ne’e atu ita halibur fila fali ita nia kbiit , ita nia matenek, ita nia korajen no determinasaun atu bele hakat konsekuensias negativas krize 2006 nian, krize ne’ebe fahe ita timor oan ba loro mono no loro sae, krize ne’ebe harahun ita hanesan povu.

Ohin loron, hanesan mo’os horiuluk, FRETILIN sei hamutuk nafatin ho kamaradas Asu’uain sira hodi dada dalan ba ita nia povu ba harii fila fali Unidade Nasional no hametin paz no estabilidade atu ita bele halao ho susesu, segunda faze luta libertasaun povu nian.

Nune’e FRETILIN, hafoin rona kamaradas asu’auain sira, deside harii:
Asosiasaun Antigus Kombatentes no Veteranus Luta Libertasaun Nasional - hodi halibur kamaradas hotu-hotu ne’ebe fo nia a’an tomak ba luta libertasaun nasional liu hosi frente politika-klandestina, armada no diplomatika.

Asosiasaun ne’e sei:
-Tau matan no defende intereses antigus kombatentes no veteranus sira nian;
-Hare oinsa atu defende intereses eis-kombatentes no veteranus sira nia faluk no oan kiak;
-Halibur dadus no valorisa memoria asu’uain sira ne’ebe fo’o isin no ran ba rai ida ne’e, ferik ka katuas ka joven mane ka feto;
-Halibur dadus fatin istorikus rezistensia nian hasoru okupasaun indonézia
-Hare oin sa mak tatoli istória lolo’os luta libertasaun nasional ba jerasaun foun no aban bai rua nian;
-Hanorin Unidade Nasional ba jerasaun foun;
-Hanorin espiritu paz no estabilidade;

Atu hamosu Asosiasaun ida ne’e, Asembleia aprova proposta Diresaun FRETILIN nian atu harii Komisaun Preparasaun ho kamaradas hanesan tuir mai:

1) José Agostinho Siqueira – Sumoxo,

2) Regina Ximenes,

3) Francisco Carlos Soares,

4) Lucia Pina,

5) Gregório Saldanha,

6) Josefa Soares,

7) Estanislau da Silva,

8) David Dias Ximenes,

9) Sukarno,

10)Aileu (a ser designado),

11) Ainaro: Manuel de Araújo,

12) Baucau: Olívio Barbosa

13) Bobonaro: Agostinho Carvalheira,

14) Covalima: Joào Sereno,

15) Dili: Ilídia da Silva Guterres

16) Ermera:António dos Santos “Lima Lima”,

17) Lautém: Pedro Sanches Faria

18) Liquiça: Antoninho Pires,

19) Manatuto: Simião Latiboi,

20) Manufahi: Adriano Corte-Real,

21) Oecusse: Paulo de Jesus Soares,

22) Viqueque: Januário Soares.

Komisaun ida ne’e mak sei prepara estatutus, halo inskrisaun membrus nian, prepara i determina loron ba primeira konferensia Nasional Kombatentes no Veteranus iha tempu badak nia laran. Atu halao nia servisu komisaun ne’e tenki kordena nia aktividades ho lideransa FRETILIN nian.

Dili, 20 Juñu 2009

Prezidente FRETILIN: Francisco Guterres "Lu Olo"

Sekretariu Jeral FRETILIN: Mari Alkatiri