FRETILIN husu PGR buka provas husi assesor internasional

FRENTE REVOLUCIONÁRIO DO TIMOR-LESTE INDEPENDENTE
BANCADA PARLAMENTAR

Kommunikadu ba Imprensa
Dili, loron 7 Maiu 2009

FRETILIN haruka pedidu Investigasaun deklarasoens KKN iha Ministeriu Finansas

Bancada FRETILIN hakerek ba Prokuradora jeral Republika nian, Sra. Dra. Ana Pessoa, husu Ministeriu Publiku investiga deklarasoens neebe mosu husi Sr. Graham Daniel, Assessor Internasional, Ministeriu Finansas, Governu RDTL iha jornal “The Weekend Australian”, loron 25 Abril 2009 katak “ema korruptu bo’ot sira” mak halo perseguisaun ba nia bainhira foti kestaun iha uma fukun kona ba nia.

Kestaun nee Xefe bancada FRETILIN iha Parlamentu nasional, Aniceto Guterres mak foti iha entrevista ho jornalista sira ohin iha uma fukun, katak iha loron 25 Abril 2009, Jornal Australianu, “The Australian”, publika artigu ida ho titulu “Timor oan halau husu esmola enkuantu assesores husi liur raut tomak”.

“Iha arigu nee, neebe kestiona makas valor ba Timor-Leste kona ba salariu bo’ot tebetebes neebe assessor internasional sira simu atu halau sira nia knaar iha Ministeriu Finansas, hetan mos entreveista ho Sr. Graham Daniels, tamba nia mos assessor ida neebe simu vensimentu bo’ot.”

“Iha artigu nee refere ba Governu nia deklarasaun katak partidu opozisaun balun hamoi Sr. Graham Daniel iha Parlamentu. Partidu opozisaun ida nunka foti Senhor ida nee nia naran molok 25 Abril 2009, no hakarak esklarese katak Deputadu PD ida mak foti Senhor nee nia naran no hamoi nia,” Aniceto temik.

Nia aumenta bancada FRETILIN preokupa liu ba deklarasaun ida husi Sr. Daniel neebe hakerek iha arigu nee, neebe nia dehan katak: “ ‘Ida nee vendetta contra hau husi ema korruptu bo’ot sira’, nia dehan. Nia lakoi fo sai se’e mak iha buat nee nia kotuk.”

Aniceto dehan katak tamba preokupasaun katak Sr. Daniel iha duni informasaun, maibe la hatene se nia fo sai ona no sei iha investigasaun ruma iha porsesu nia laran ona mak bancada hakerek ba PJR, hanesan tuir mai:

“Bancada FRETILIN, nudar bancada bo’ot liu no rekonesidu liu nudar opozisaun, preokupa katak alegasaun ida nee bele infere katak FRETILIN mak buka taka ema korruptu nia hahalok ho ‘vendetta’ ida neebe nia deklara. Bancada FRETILIN hakarak deit mak halo nia fiskalizasaun no luta kontra KKN.

Bancada FRETILIN preokupa katak Senhor nee iha duni informasaun kona ba ema korruptu iha Ministeriu Finansas ka fatin seluk, tamba nia deklara hanesan nee duni, ‘maibe nia lakoi fo sai se mak iha buat nee nia kotuk.’

Tamba nee, bancada FRETILIN, hakerek surat ida nee mai ita bo’ot atu investiga husi Senhor Daniel, se mak ‘ema korruptu bo’ot sira’ nee. Bancada FRETILIN la iha konesimentu kona ba se mak nee, maibe hanoin katak Sr. Daniel nia konesimentu nee importante atu loke lia los kona ba KKN iha Ministeriu Finansas ka neebe neebe deit.”

Aniceto dehan mos katak “Bancada FRETILIN la hatene sei investigasaun ruma hahu ona kona ba ‘ema korruptu bo’ot sira’ neebe Sr. Daniel refere, maibe hakarak ‘ema korruptu bo’ot sira’ neebe nia refere hetan investigasaun no prosesu sei iha duni indikasoens hahalok krime ruma.”

Kontaktus ba informasaun adisional: +670 728 7080 ho email: fretilin.media@gmail.com