Komunikadu ba Imprensa Husi FRETILIN

FRETILIN
FRENTE REVOLUCIONÁRIA DO TIMOR-LESTE INDEPENDENTE

KOMUNIKADU BA IMPRENSA
Dili, 24 Maiu 2009

COMITE CENTRAL FRETILIN FO APOIU TOTAL ESPULSAUN MILITANTES TANBA VIOLA ESTATUTU FRETILIN

Iha reuniaun Comite Central Partidu istoriku FRETILIN nian horseik, Comité Central por unanimidade apoia desizaun Komissaun Nasional Jurisdiksaun neebe espulsa militantes partidu FRETILIN nian sr. Reis Kadalak, Vicenti Ximenes “Maubosi”, Victor da Costa no José Luís Guterres tanba sira “halo violasaun grave no todan kontra Partidu FRETILIN nia prinsipiu no linha politika.” Informasaun ida nee fo sai husi adjuntu sekretariu geral partidu FRETILIN nian, Jose Reis, ba media nasional no internasional ohin iha Dili.

Reis dehan mos ba media katak CCF apoiu ho unanimidade desizaun KNJ nian “atu hola medidas suspensaun ba camarada António Railakan, militante no membro Comité Central FRETILIN” tanba nia hahalok “ladun grave ka todan”, no partidu istoriku FRETILIN bele “fo tempo tinan ida ba membro CCF nee atu bele regularisa-an tuir estatu” partidu nian.

“Relatoriu neebe KJN hato’o iha reuniaun CCF, fundamentu klean no justu tebetebes tuir estatutu partidu FRETILIN nian. Membrus CCF tomak neebe hola parte iha reuniaun horseik, halo analisis ho kuidadu, diskuti no fo konsiderasaun klean ba militantes nain haat nia hahalok molok CCF vota ho unanimidade atu apoia mediadas neebe KNJ hola neebe espulsa sira tanba violasaun grave no todan kontra partidu FRETILIN nia prinsipiu no linha politika. Maibe ho kazu militante António Railakan KNJ konsidera nia hahalok ladun todan no grave no fo oportunidade ba nia atu korigi a’an, no CCF mos concorda no apoia ho unanimidade medidas indisiplinares neebe sira hola.”

“Hau hakarak reforsa katak partidu FRETILIN hatudu toleransia makas ba eis militantes sira nee ninia hahalok kontra partidu nia prinsipius no linha politika iha tinan neen nia laran ona. Relatoriu KNJ detalhadu lolos no aprofundadu tebetebes kona ba sira nia hahalok kontra partidu. Tuir estatu partidu FRETILIN (artigu 86) partidu liu husi KNJ iha kbiit atu julga no hola medidas indisiplinares, inklui espulsaun, ba militantes neebe viola sira nia deveres no obrigasoens ba partidu FRETILIN. Maibe KNJ mos fo ‘garantia de defesa’ ba sira idaidak atu mai defende a’an hasoru alegasoens kontra sira tuir artigu 87 estatutus partidu nian. Sira hotu hetan notifikasaun ho tempo razuavel no oportunidade atu mai defende a’an, maibe ida deit mak comparese, no ida seluk deit mak hatan por escritu. Partidu FRETILIN hatudu toleransia máxima, maibe tempo to’o ona atu hola medidas indisiplinares atu hametin disiplina partidaria no reforsa respeitu ba estatutu partidu nian,” haktuir José Reis.

Reis hatutan katak partidu istoriku FRETILIN nia Komisaun Nasional Jurisdiksaun sei iha prosesu balun neebe sei nakloke hela hasoru militantes seluk tanba iha alegasoens seriu no grave katak sira mos viola prinsipius no linha politika partidu nian, tuir neebe KNJ bele mos hetan medidas indisiplinares. Prosesu hirak nee sei halau iha tempo badak nia laran, ho objectivu atu hametin nafatin disiplina iha partidu nia laran no respeitu ba estatutu partidu nian.

Iha reuniaun ida nee CCF hasai mos desizaun atu harii komissaun ida atu analisa no defini criterius kona ba selesaun partidu istoriku nia candidatus neebe atu concorre iha eleisoens municipais neebe sei mai. Komisaun nee nia relatoriu ho rekomendasoens sei entrega ba Komisaun Politika Nasional iha semana rua nia laran.

ATU HUSU INFORMASAUN SELUK TAN DERE BA: José Teixeira +670 728 7080