Frente Revolucionária de Timor Leste Independente

DIRECÇÃO FAFC

Coordenador – Geral

Eng. Samuel Freitas

Vice CoordenadorGeral

Alexnadre Pinto

Contactos:

Samuel Freitas (00351-913892252)

e-mail : faf-coimbra@hotmail.com

Residência Universitária de Santiago, bl. 4, 3810-193, Aveiro, Portugal.


domingo, 31 de maio de 2009

Palestra Husi Deputadu Elizario Ferreira iha Seminar ICFJ

PARLAMENTO NACIONAL
BANCADA PARLAMENTAR FRETILIN
“ PAPEL GOVERNU HADIA KUALIDADE ENSINU BAZIKU IHA AREA RURAIS TIMOR-LESTE”
Husi: Deputado Elizario Ferreira

I. Visaun geral konaba Edukasaun

Baseia ba tema refere mak papel Governu nuudar orgaun ezekutivu define no hala’o politika jeral nasaun nian, wainhira hetan aprovasaun husi Parlamentu Nasional. Relasaun ho edukasaun. Politika estadu nian mak atu ema hotu iha direitu ba edukasaun ida ne’ebe diak, tuir Artigo 59 CRDTL ( Edukasaun no Kultura);

  1. Estadu rekonhese no garante sidadaun hotu nia direitu ba edukasaun no kultura, nune’e mos harii sistema ensinu baziku universal, obrigatoriu no wainhira bele saugati, tuir lei haruka.
  2. Ema hotu iha direitu hanesan, ba oportunidade atu eskola no ba formasaun serbisu/profisaun nian.
  3. Estadu rekonhese no fiskaliza eskola particular no kooperativa sira.
  4. Estadu tenki garante ba sidadaun hotu-hotu, tuir sira-nia kapasidade, atu bele hetan eskola boot kona-ba investigasaun sientifika no hamoris/haburas arte.
  5. Ema hotu iha direitu atu goza no harii kultura hanesan nia obrigasaun atu haburas, defende no mos fo valor ba patrimoniu kultura.

Baseia ba konstituisaun no tuir ema hotu nia interpretasaun maka povu Timorense tenke hetan edukasaun ida diak ho kualidade, produtivu, demokratiku, auto-suficiencia, ho valor nasionalisme, laiha iha diskriminasaun, maibe iha igualidade tuir kontestu global.

Ita hotu hatene katak iha Timor-Leste +60% populasaun iha rurais mak sei moris iha analfavetismu (hakerek no lee la hatene), tamba ne’e papel estadu nian mak buka atu hamenos no halakon analfaveto ne’ebe mak sei aas no hodi loke dalan atu hasae rekursus humanus iha Timor-Leste.

II. Orsamentu Geral do Estadu

Orsamentu Geral do Estadu ba tinan 2009 iha montante $ 680.873, espesifiku ba edukasaun $ 62.570 ne’ebe fahe ba kategoria hanesan tuir mai:
o Salariu no Vensimentu $ 32.313
o Bens e Serbisu $ 10.685
o Kapital Menor $ 2.779
o Kapital Dezenvolvimento $ 12.795
o Transferensia Publika $ 4.000

Husi transferensia publika $ 4.000 milhoes ne’e fahe ba parte rua konsesaun Publikas $ 2.5 no ba Refeisaun Kente $ 1.50 Milhoens, kuanti ida ne’e povu sei hetan venificio seluk husi rubrika sira refere fo liu venificio ba makina do estadu/Ministeriu edukasaun nian.

III. Politika Eskolaridade 9 anos

Nudar opozisaun ami mos hakarak hatete katak politika eskolaridade 9 anos diak tebes, maibe mos iha ninia inpaktu ekonomiku ne’ebe aas tebes hanesan:

1) Professores

  1. Presiza formasaun no treinamento intensivo barak liu tan ba profesores sira.
  2. Sei aumenta tan numero professores tamba ensino basiko hahu husi quinta klase ho professor disiplina ka (guru bidang studi) uluk sei ho guru kelas ninia implikasaun katak sei aumenta tan numero profesores.
  3. Uma ba profesores sira sei laiha ne’ebe difikulta profesores husi fatin ida atu ba hanorin iha fatin seluk
  4. Salario ba professor sira sei ki’ik i la-iha insentivo ba professor sira be hanorin iha areas rurais.
  5. Lingua sei nuudar obstakulo ida ba profesores sira. Iha politika eduksaun hatete katak lingua Portuges hanesan lingua de instrusaun ka hodi hanorin maibe realidade profesores barak maka seidauk domina lingua Portuges, iha eskola balun iha foho sei hanorin ho lian local hanesan Bunak ka Fataluku ka seluk-seluk tan.
  6. Tuir informasaun ami rona katak kurikulo ba ensino baziku hahu kedas iha quinto ano ka (klase lima) hahu hanorin lian Engles ita nia preokupsaun maka ne’e lian Portuges deit sei hanesan obstakulo sa-tan ita aumenta Engles, ninia implikasaun maka ita sei aumenta tan professores ba lian Engles i formasaun ba sira signifika katak sei aumenta tan orsamento no labarik sira nia tinan sei ki’ik ita hanorin babarak entaun bele difikulta fali labarik sira nia prosesu aprendizazem.

2) Infraestrutura no Fasilidades

  • Geografikamente distansia eskola sira do’ok malu entre eskola primaria ho primaria no primaria ho pre-sekundaria.
  • Uma eskola seidauk too ba fatin hotu-hotu liliu iha areia rurais (sukus no aldeia) ne’ebe dook malu no eskola kumunidade maka sei hari provizorio ho duut ka talitahan.
  • Populasaun balum fila ba nia tur fatin ne’ebe hela dook husi eskola implika ba nia oan sira atu ba eskola dook ho tinan kiik
  • Meja ho kadeira mos sei falta iha fatin barak ita hare alunus sira sei tur iha rai
  • Labarik barak iha foho seidauk konsege remata sira nia eskola, iha eskola primaria tanba sira nia tinan bo’ot ona sira barak maka prefere liu hakotu sira nia eskola.
  • Profesores barak maka hanorin iha sidade ka vila deit maibe iha suku no aldeia falta tebes ba profesorse

3) Mekanismu avaliasaun

  • Tuir lei baze edukasaun katak ensino Baziko iha siklus 3 (tolu) klase ida to hat haran primeiro siklu, lima ho nen Segundo siklu I hitu too sia ka uluk hanaran Pre-Sekundaria hanesan terseiro siklu nee hatudo katak nia implikasaun sei halao ezame final ka (ebtanas) dala tolu i klaru katak sei afeta ba orsamenta estado.
  • Tuir informasaun maka ami rona katak so alunos iha nonu ano ka remata pre-sekundario maka foin hetan diploma (ijasa) ne’e ita bele dehan katak labarik barak maka sei abandona (putus) iha eskola tamba hodi tinan naruk maka hetan diploma I nia implikasaun ba oin konpete ba merkadu de trabalo sei klasifika Timor oan unqualified tamba la iha diploma ida minimo iha sira nia liman entaun ema liur maka sei domina kampo de trabalo, tamba deit ita laiha diploma I ita koalia kona rekursu humano maibe ita rasik maka hamosu sistema ida atu impata fali rekursu humano fo fali oportunidade ba ema liur.

4) Merenda eskolar

  • Tuir esplikasaun osan ba merenda eskolar atu sosa aihan local maibe informasaun ne’ebe ami hetan maka sosa fali koto no foos sira mai husi rai liur ne’ebe praju liu ona la konduz ho labarik sira nia organismo ka (daya tahan tubu) balun lanu tan labarik sira.
  • Iha osan ba ema sira halo refeisaun ba labarik sira, maibe realidade hatudu katak iha eskola sira ne’ebe iha foho professores sira sei halo kobransa hodi selu ema sira ne’ebe prepara refeisaun. Ita lahatene osan sira aloka hodi selu ema sira tein ba ne’ebe?

5) Programa Alfabetizasaun

  • Programa alfavetizasaun hetan lansamentu iha tinan 2006 maibe iha tinan 2007, 2008 ita hare la la’o no foin mak halo lansamentu iha Oecusse iha iniciu Abril 2009 nia laran. Tinan 2007 no 2008 iha orsamentu mak aloka ba programa ne’e maibe la halao osan ne’e halo fali programa saida?

IV. Konkluzaun

Bainhira ita koalia kona Edukasaun ka Saude nee laos preokupasaun estadu nian deit maibe ema hotu nian, tamba konsagra tia ona iha kostituisaun partidu sa deit maka kaer governo sei sai hanesan preoridae ba ninia governasaun maibe ita tenki hare ba aspektus realidade iha tereno (lapangan).

Se karik ita hare ba plano Ministerio Edukasaun iha governasaun AMP nia okos ita bele hasai konkluzaun ida katak plano nee ambisiozu tebtebes tamba ita hare ba faktores sira be ita temi ona iha leten, se bele karik ita remata lai ho ensino baziko too lai ensino primario ka tinan neen maka ita hakat ba tinan sia hanesan mos esperiensia ita nia nasaun vizino balun nian tamba ho tinan neen mos ita seidauk akomoda hotu labarik sira iha foho sa-tan ba tinan sia.

Iha indicios balun hatudo mai ita katak ita hakarak halo plano boot atu bele hetan orsamento ida bo’ot maibe ita nia kapasidade la too atu ezekuta entaun ita bele dehan halai ba korupsaun para oinsa atu uza orsamento hotu lalais atu labele iha cary over maibe resultado la-iha maske ita hatene katak cary over ne’e buat diak ida ne’ebe atu hatudu deit katak estadu funsiona ka iha ninia kontinuidade nune’e mos iha realidade hatudu katak projectu fisiku la halo deit iha tinan ida nia laran maibe presisa tempu ida ho durasaun 2 too 3.

Obrigadu wain.