Dili, Kuarta-feira, loron 15, Abril 2009
FRETILIN husu ba Banku Mundial ho AusAID atu klarifika nomeasaun iha Ministeriu das Finansas Timor-Leste nian.
FRETILIN, partidu boot liu iha Parlamentu Nasional hakerek ona karta ida ba Banku Mundial ho AusAID hodi husu dokumentus relasionadu ho rekrutamentu ba asesôr sira husi Ministera das Finansas, Sra. Emilia Pires.
Vise Prezidente FRETILIN, Deputadu Arsenio Bano, dehan ba jornalista sira iha Dili ohin katak Banku Mundial ho AusAID maka finansia pozisaun sira ne’e, maibe José Alexandre Gusmão nia governu lakohi fô-sai ba Parlamentu kona-ba ba prosesu recrutamento ka oinsa mak sira halo nomeasaun sira ne’e.
Bano dehan, karta FRETILIN nian ne’e hatudu preokupasaun oioin husi deputadu sira ne’ebé aumenta bebeik, inkluindu husi sira AMP balun rasik, kona-ba prosesu rekrutamentu ba asesôr sira ne’e no môs sira nia kualifikasaun ho salariu.
Lider AMP na’in rua – vise xefe bankada PD, Deputadu Rui Menezes ho xefe bankada PSD, Deputadu Fernando Gusmão – iha 30 de Marsu husu atu estabelese komissaun parlamentar ida atu investiga rekrutamentu ba diretôr nasional sira iha ministeriu laran ne’ebé nakonu ho kontroversia, no môs involvimentu husi asesôr australianu sira ne’ebé nomeadu politikamente.
FRETILIN hakarek ba parseiru dezenvolvimentu Timor-Leste nian hotu-hotu ne’ebé tuir konferensia Parseirus Desenvolvimentu sira iha Dili iha dia 1-4 de Abril, inkluindu Banku Mundial ho AusAID, hodi husu ba sira atu "garante hari’i mekanizmu diak atu halo gestaun no môs kontrola implementasaun ba asistensia externa ho efikas no môs ho transparensia."
Iha karta hakerek iha dia 2 de Abril, 2009 ne’e hakerek môs kona-ba FRETILIN nia preokupasaun ho rekrutamentu ba " ‘asesor’ sira ne’ebé la iha perisia teknika no môs sira nia experiensia duvidozu, ka dalan ruma la’os apropriadu, inadekuadu ate balun laiha experiensia natoon, maibe hetan fatin tanba de’it sira iha ligasaun partikular ka relasaun polÌtika ho governu de facto ida ne’e. Ho transparensia no môs honestidade ne’ebé mukit tebetebes sei halo fraku ita nia esforsu tomak atu estabelese boa governasaun no hametin direitu de estadu demokratiku iha Timor-Leste."
Bano fô komentariu: "Ami konfia katak parseiru de dezenvolvimentu sira ne’e rona momos ami nia preokupasaun neebe tatoli iha carta neebe haruka ba sira. Maibe ami hakarak asegura katak momentum ne’e sei la hotu iha ne’ebé i asistensia externa hotu-hotu ho objetivu atu red·s pobreza no môs estabelese estadu demokratiku ne’ebé respeita lei, tenke gasta ho transparensia tomak no môs honestidade.
"Tan ne’e mak ohin ami haruka segunda kartaba Banku Mundial ho AusAID hodi husu ba sira kona-ba detallu pozisaun hotu-hotu ne’ebé finansiadu, kôpia kontratu sira ne’e ho dokumentu kona-ba prosesu rekrutamentu ho dokumentu seluk ne’ebé relevante. Dokumentu ho informasaun hirak ne’e duni mak ami husu ba Sr. Xanana Gusmão nia governu de facto maibé sira la fô to’o agora.
Ami konfia katak Banku Mundial ho AusAID sei ajuda atu garante transparensia ho honestidade bainhira sira rekruta asesor sira ne’e iha Ministeriu das Finansas."
FRETLIN formalmente husu tiha ona dokumentu sira ne’e ba Ministra Emilia Pires ho Primeiro Ministro de facto Sr. Gusmão iha fulan Juñu, 2008, i husu dala ida tan durante debate orsamentu nian iha fulan Janeiru, 2009.
"Ami iha iha esperansa boot katak ami nia parseiru de dezenvolvimentu sira sei la halai husi sira nia responsabilidade atu ajuda povu Timor-Leste atu iha governu ida nakloke no môs responsavel."
"Se parlamentu bele hetan informasaun sira ne’e lalais liu, mekanizmu, se karik presiza, atu hadi’a fali defisiensia ruma, entaun ita bele môs halo buat ruma lalais liu," Bano dehan.
Ba informasaun tan dere ba Jose Teixeira 728 7080 ho Arsenio Bano 741 9505
