Komunikadu IMPRENSA HUSI FRETILIN: Hasai Lucia: Xanana nia responsablida

KOMUNIKADU BA IMPRENSA

Dili, 24 Abril 2009

Hasai Lucia: Xanana nia responsablidade; nia krebilidade nudar líder mak iha duvida dadaun.

Nudar Xefe Governu, neebe mos Primeiru Ministru, maske de facto, Sua Excelencia Xanana Gusmao mak iha responsabilidade total kona ba hahalok nia Ministru ka Membru Governu ruma. Tanba nee mak se nia la hasai kedas Ministra de Factu Justisa Lucia Lobato, entaun nee signifika katak nia tolera duni KKN no nia simu hahalok ida nee.

Xefe bankada parlamentar FRETILIN nian koalia lia fuan hirak neen foin fila mai Dili husi Oekussi.

“Se S.E. Sr. Xanana Gusmao la demiti agora kedas Ministra De Factu Justisa Lucia Lobato, ita hotu bele fiar metin katak nia liafuan murak hasoru KKN, mak nee deit. Lia fuan murak deit. La iha konviksaun politica nem itoan, la iha vontade politica nem itoan atu hasoru preokupasaun bot iha ita nia rain,” dehan Guterres.

“Iha Outubru 2008 liu ba Jornal Tempo Semanal publika ‘alegasaun SMS’kona ba Sra. Lucia Lobato. Alegasaun hirak neeba grave tebetebes no mosu husi Sra. Lucia Lobato nia hanfone rasik. Hafoin alegasaun hirak neeba publika, bankada FRETILIN halo deklarasaun politika, neebe bankada ezigi katak S.E. Sr. Gusmao iha obrigasaun no responsabilidade nudar Xefe Governu atu hasai asaun ruma, liliu hasai nia kedas, tanba iha ona alegasaun grave no kredivel kona ba KKN kontra Sra. Lúcia Lobato. Maibe to’o ohin loron la iha indikasaun ruma, nem iha liafuan ruma husi Sr. Gusmao desde tempu neeba to agora.”

Iha loron 20 Abril 2009, Jornal Tempo Semanal publika fali alegasaun foun kona ba Ministra Justisa, Sra. Lucia Lobato no nia kaben Sr.Americo Lopez, kona ba uza deit kompania Wasupa nia naran atu hatama farda guardas prisionais nian.

Jornal Tempo Semanal foti alegasoens neebe koalia husi sidadaun Timor oan neebe kompania nia nain rasik,neebe deklara katak Sra Lucia Lobato no nia kaben mak husu sira no selu osan 10% folin projectu nian ba sira atu bele uza sira nia kompania ba manan projetu ida neebe iha ninia ministeriu rasik.

“Nee ema neebe envolvidu rasik mak deklara. Laos ema seluk ka terseira pessoa mak konta. Nee grave tebetebes, no relasiona fali ho kazu uluk neebe publika iha Outubru tinan kotuk neebe alega katak ministra fo projetu ba nia a’an rasik. Alegasaun iha tempu neeba mosu iha SMS neebe ministra rasik haruka ba Ibu ida iha Indonesia neeba,neebe hatudu Sra. Lucia rasik mak kaer fali preparasaun projetu sosafarda nian.”

Nee alegasaun makas tebetebes. Sr. Gusmao labele husik hela deit.Nia tenke hasai Sra. Lucia agora kedas. Sra Lucia kaer hela projetu barak iha nia ministeriu, neebe precisa ema ida neebe iha kredibilidade a’as liu. Neebe Povu hotu bele fiar, hanesan projetu terras no propriedades. Notaridao Publiku mos iha nia okus.Protesuan testemunhas mos iha nia okos. Buat barak. Justisa bele lakon nia kredibilidade tamba ema ida neebe iha mahon metan bot ida iha nia leten.

Bankada FRETILIN responsabiliza Sr. Gusmao rasik baasaun hotu Sra. Lucia Lobato neebe halakon ka usa kleuk osan estadu nian, desde tempu uluk bainhira bankada ezigi demisaun, maibe Sr.Gusmao la hataaan nem hola medida ruma,” Guterres aumenta.

Tuir Guterres iha rain demokratiku barak, alegasaun fortes hanesan nee deit to'o atu ministru ida demiti a'an ou hetan demisaun. Nia dehan katak iha Timor-Leste presedenti iha ona husi 2006 katak membru governu neebe hetan deit alegasaun forte iha obrigasaun atu demiti a'an, bainhira Ministru rua demiti a'an tamba alegasaun deit, noprimeiru ministru ida tan.

Guterres dehan tan: “Nee alegasaun seriu ona mos hanesan uluk. Nee laos quarter, nem satu dolar Sr. Gusmao. Nee US$97,000. Se ita dehan tenke hasai tamba naok quarter, no tenke hanoin diak atu naok mos satu dolar deit, entaun ho US$97,000 nee seriu ka lae?”

BA INFORMASAUN TAN DERE BA DEPUTADU ANICETO GUTERRES 723 8569 OU JOSETEIXEIRA 728 7080